Pagbugtaw sa tingusbawan

Wala dayon manaog si Willy gikan sa barkong iyang gisakyan, bisan nakalandig na kini diha sa may pantalan. Naghinan-aw lang gyud una siya sa ubang mga pasahero, nga nag-inilogay sa pagkanaog.

Sa iyang pagpaniid, morag naghinamhinam na gayud ang kadaghanan sa mga pasahero, nga makakawas na sa barko. Labi na gyud kadtong dunay misugat kanila. Kay ubay-ubay man sab ang mga tawo nga nanugat sa maong barko diha sa may pantalan.

Sa iyang bahin, si Willy wala gayud batia bisan diyotay na lang nga kahinangop. Kay si kinsa man tuod ang mosugat kaniya, kay wala man siya’y mga kadugo niadtong lugara. Ug bisan na lang unta og mga kaila?

Kining pagkaanhia gud niya sa dakbayan sa Sugbo, naigo man lang og panimpalad. Usa lang ka pagsulay. Kay basin anhi niya mapalgi ang maayo niyang kapalaran. Nga wala gayud niya mapalgi didto sa Mindanao. Ang gibantog unta nga, "yuta sa mga saad".

Sa tinuoray lang, morag gilisdan na kaayo si Willy sa iyang pagkabutang didto sa Mindanao. Kay nagpunay man lang gihapon siya’g laroylaroy. Ug wala gyo’y pihong kaabtan. Bisan na lang gani unta’g katulganan.

Sayo man gud kaayo siyang nailo sa iyang mga ginikanan. Ug wala usab siyay mga kadugo didto sa Mindanao, nga sarang niyang kadangpan. Ug kapangayoan og panabang, sa panahon sa iyang pagpanginahanglan.

Nabuhi lang gani intawon siya, pinaagi sa pagpakilimos, ug sapagpamunit usahay og mga butang nga sarang niyang ikabaligya, aron lang masapian.

Bahin usab sa iyang pagkatulog, bisan asa na lang siyang dapita. Mahimong anha siya mahikatulog sa mga plasa, ug dili ba diha sa mga aseras, tipon sa uban usab nga mga binuhat nga sama usab kaniya.

Mao man gani, nga nakahunahuna siya sa paglangyaw. Ug ang dakbayan sa Sugbo maoy iyang napilian. Daghan naman gud kaayo siya’g nadunggan bahin sa dakbayan sa Sugbo. Ilabi na ang kusog kaayo nga pag-uswag sa maong dakbayan.

Tungod sa dakong tinguha ni Willy nga makaanha gayud sa dakbayan sa Sugbo, naningkamot gayud siya nga makatigom og kuwarta, aron duna siyay ikapamasahe sa barko. Hinayhinay niyang gitigom ang iyang kinitaan sa pagpamaligya og mga puthaw, mga lata ug mga plastik. Gikuhaan una hinuon niya kini alang sa iyang pagkaon ug uban pang mga kinahanglanon.

Ug maong ania na siya karon, sakay sa maong barko, nga bag-ohay pa lang midunggo. Ning sayong kabuntagon. Kuyog usab sa ubang mga pasahero,nga gikan pa lang gayud sa Mindanao.

Samtang naghinayhinay si Willy og kanaog sa barko, nagsugod usab sa paglatagaw ang iyang hunahuna. Naglibog man gud siya, kun asa siya mopaingon, gikan dinhi sa pantalan.

Wala man gud siyay piho nga kaadtoan. Kay gawas nga wala siya’y mga kadugo sa maong dapit, wala usab siyay kaila. Ug labaw sa tanan, wala pa usab siya masuheto sa mga nagkalainlaing dapit sa dakbayan. Hinuon, dunay mga dapit niini, nga kanunay niyang makita sa mga mantalaan.

Sa kadugayan, nakahukom ra gayud si Willy. Kinahanglan nga magmarkabahala na lang gyud siya. Bahala na lang kun asa siya ipadpad sa kapalaran. Ang mahinungdanon alang kaniya, nga mapalgan ra gayud niya ang gibugtaw niyang tingusbawan. (Kataposan)