Ang Impiyerno ni Belen - 2

Gula 26

Unya, nagdungan mi’g sangko sa kinapungkayan sa himaya. Mora mi’g mga langgam nga nagtagbo sa paglabok sa ibabaw sa panganod. Unya naghangos ming mitiurok gikan sa makutas nga kombate.

Dihang mikawas na si Homer gikan sa ibabaw sa naghayang kong lawas, mibangon ko ug misulod sa banyo. Sa akong paggawas, natukmaan ko si Homer nga nagpasalida sa tv. Sa akong pagsabot, mora’g wala pa siya’y plano nga manggawas na mi sa motel maong ako siyang giapura.

“Manggawas na ta dinhi, Homer,” giingnan ko siya.

“Unya na,” giingnan ko niya. “Tilokon nato ang tulo ka oras nga short time. Mo-score pa ta’g-usab.”

“Gusto na kong mopauli.”

“Ang last trip na lang maoy atong sakyan.”

Wala na lang ko motingog. Milingkod ko sa ngilit sa kama. Namatikdan ko nga gibalhin-balhin ni Homer ang TV sa lainlaing channel. Hangtod nga iyang natultolan ang salida sa tv nga x-rated.

Mitan-aw si Homer sa maong salida. Iya sab kong gipatan-aw. Kaming duha ang nanan-aw sa for adults only nga salida.

Dangtan og pipila ka gutlo, gikabig ko ni Homer paduol niya. Iya kong gigakos ug gihagkan. Bugnaw ang kuwarto nga among nahimutangan apan nanginit pag-ayo si Homer. Ingon sa nadala siya sa kainit sa salida sa tv nga among gitan-aw. Hasta ko nadala sab! -- Sumpayan pa