Ang pagbalik sa kampiyon

Lagsik ang mga lakang ni Rafael nga nagsubay sa dalan paingon sa lungsod sa San Sebastian aron pagsalmot sa usa ka away sa boksing, kabahin kini sa nagsingabot nga tinuig nga pangilin sa maong lungsod. Nikidlap ang dangas nga agtang niini nga natandangan sa naglagiting nga kainit sa adlaw. Sa edad nga singkuwenta bisan og mora na og moligti na ang iyang mga lotahan, sa paminaw ni Rafael aduna pa siya'y ikaboga sa natad sa pamoksing bisan og wala pa siya'y tarong nga ensayo.

Samtang siya nagbaklay, gilupad siya sa iyang handurawan balik niadtong siya pa ang giila nga kampeyon sa world flyweight division. Kaniadto ilado kaayo ang iyang pangalan, Rafael "Raffy" Bamboa, Ang Pambansang Suntok. Mga media personality, celebrity, ug mga politiko ang pirmi nga mag-alirong kaniya. Sa kinapungkayan sa iyang boxing career, iyang nakarelasyon si Katrina Reyes, usa ka starlet sa pelikulang Tagalog. Pinaagi ni Katrina, nakat-on si Rafael sa pagsugal ug pagsulod sa casino. Tungod sa iyang pagpakaboang sa starlet, nga makausa nahilambigit sa sex video scandal, iyang napasagdan ang iyang boxing career, mao nga sunodsunod nga kaparotan ang iyang nahiaguman, unya mora lang siya og trapo nga gibiyaan sa babaye.

Ulahi na ang tanan dihang iyang naamguhan nga igo lang diay siya nga gipanguwartahan ni Katrina. Tungod sa maong hitabo nakahunahuna siya sa paghunos sa iyang kinabuhi pinaagi sa pag-ambak unta sa pangpang maayo gani kay napugngan kini sa amahan ug anak nga Iloy ug Milagring nga nagkaingin niadtong tungora. Wala magdugay nahimo niyang asawa si Milagring ug katambayayong na niya sa pagpanguma.

Naikag siya karon sa pagsalmot sa away sa boksing tungod sa premyo nga lima ka libo ka pesos, makatabang gayud ang maong kantidad para sa pagpaeskuyla sa ilang anak ni Milagring nga si Bingkay, maoy iyang damgo nga maka-graduate gayud kini sa high school aron makatrabaho sa MEPZA.

Mora og magdugo ang kasingkasing ni Rafael nga makapamalandong nga wala gayud makatilaw ang iyang anak sa kaharuhay nga iyang naagian kaniadto. Baktason lang gani sa iyang anak ang lima ka kilometro nga distansiya gikan sa ilang barangay sa Danglag ngadto sa San Sebastian High School aron makaeskuyla. Wala gayud kini makatilaw og hamburger sa Jollibee. Wala gani maka-attend sa JS Prom kay wala kini niya mapaliti og bag-o nga sinina.

Daghan na ang mga tawo atubangan sa merkado, ubos sa landong sa akasya diin adto pagahimoon ang iyang away. Gisugat dayon ni Rafael sa iyang ig-agaw nga si Longlong.

"Gaw Rafael tayming kaayo ang imong pag-abot, inyo na ni Dagol Komongbato ang sunod nga away. Bisan wala kay tarong nga practice gaw, kahibalo ko nga kaya ra kaayo ni nimo, niagi gud ka pagkakampeyon adtong una," matud ni Longlong nga nitunol sa usa ka plastic nga ice water ngadto sa gikutasan pa nga si Rafael.

"Gaw Longlong akong paninguhaon ang pag-angkon sa premyo nga lima ka libo ka pesos para sa akong anak nga si Bingkay," matud ni Rafael nga misuyop sa ice water.

Sa unang round, nagkadipodipo og sagang si Rafael, wala siya magdahom nga kusog diay og kumo si Dagol nga usa ka kargador sa merkado. Labaw sa puntos si Dagol sa unang round. Sa ikaduhang round, usa ka makusog nga straight cut ang mitama sa nawong ni Rafael nga nakapalipong niya, nitoyok og kalit ang palibot. Nanukad si Dagol aron pag knock down na ni Rafael. Apan kalit si Dagol nga nasuwawan sa agtang ni Rafael kay adunay silaw sa adlaw nga nilapos sa landong sa akasya ug diha motama sa dangas nga agtang niini. Gipahimuslan kini ni Rafael, nibuhi kini og usa ka makusog nga upper cut, misagunto si Dagol ug iya dayon kining gisundan og left cross. Mora og baki nga nitikangkang si Dagol. Bisan sa gibating sakit sa kalawasan ni Rafael, malipayon gihapon ang kanhi kampeyon nga nidawat sa ganti nga lima ka libo ka pesos para sa iyang pinalanggang anak nga si Bingkay. (Kataposan)