Ang kabilin

Samtang nagdula og basketball si Crispin ug ang iyang mga barkada, "Hoy Crispin!" mitawag ang usa niya ka higala. "Papaulion ka kuno kay naglisud na si papa nimo."

Apan wala maminaw si Crispin nga nagpadayon kini sa pagdula. Wala madugay, miabot si Bitoy ang iyang manghod.

"Kuya, papaulion ka ni mama kay naglisod na si papa."

"Ingna sila nga dili pa ako mopauli," pintok nga tubag ni Crispin.

"Tingali'g mamatay si papa, Kuya, nga wala ka didto," mabalak-on ang tingog sa iyang manghod.

"Unsaon ta man kun mamatay si papa nga wala ako didto, basta dili pa ako mopauli." Gipahunong una sa reperi ang dula.

"Pauli lang una Cris, balik lang unya," matud sa reperi.

"Basta dili pa ako mopauli," nangisog si Crispin, "sige, ipadayon nato ang dula, total bisan hunongon ni, di pa man gyud ako mopauli."

Wala silay nahimo, kondili ipadayon ang dula, samtang sa ila ni Crispin, nagwarawara sa iyang kamot si Iyo Sebyo nga nagpanawag kang Crispin.

"Di pa kuno mopauli si Kuya Crispin, Ma," matud ni Bitoy nga bag-ong nahi-abot. "Ngano man na si papa Ma, nga nagwarawara man sa iyang kamot?"

"Nangita na siya Dong ug kahatagan sa iyang kabilin."

"Ako na lay dawat anang iyang kabilin, Ma."

"Ayaw Dong, kay bata ka pa."

"Ngano man diay og bata pa ko Ma, unsa man diay ang ibilin ni papa?"

"Dali diri sa layo, kay sultihan tika." Ug giagak ni Iya Munda si Bitoy palayo sa iyang bana. "Ibilin ni papa nimo ang iyang pagka-ungo ug ang wak-wak nga anaa sa sulod sa iyang ginhawaan."

"Mao diay nga dili mouli si Kuya Crispin, Ma!"

"Mao nay hinungdan."

"Unya, kun mamatay na si papa, Ma, nga wala siya’y kabinlan?"

"Maayo hinuon Dong, aron maputol na ang pagka-ungo sa pamilya ni papa mo.

"Diha-diha, nabugto ang gininhawa ni Iyo Sebyo ug migawas ang usa ka langgam gikan sa iyang baba. (Kataposan)