Gula 22
“May transaksiyon sab diay ka dinhi?” Gipangutana ko si Homer.
“Wala,” niya pa. “Ikaw maoy akong tuyo.”
“U-unsa?”
“Manan-aw ta’g sine.”
Sa makadiyot naghunahuna ko. Kabalibaron ko pero mora’g maikog ko ni Homer. Wala sab ko’y nahunahunaang balidong rason nganong akong balibaran ang iyang pagpanghagad nako nga manan-aw mi’g sine.
Misugot ko. Dihadiha nanggawas mi sa buhatan sa SSS. Mipara dayon si Homer og tricycle. Apan imbes sa sinehan mi magpahatod, giingnan ni Homer ang driver sa tricyle nga adto mi sa UCV’s Best Inn.
Nakasabot dayon ko kun unsay tuyo ni Homer nako. Pero nagpagoryogoryo ko. Samtang nagdagan ang tricycle nga among gisakyan, gipangutana nako si Homer. Nagpa-“as if” ko nga wala makasabot sa iyang tumong.
“Nganong sa UCV’s Best Inn man ta magpahatod?” nangutana ko. “Manan-aw man kaha ta’g sine.”
“Ayaw na lang paglangas,” gihunghong ni Homer ang iyang tubag sa akong dalunggan. “Pasagdi na lang ko nga modiskarte.”
Wala na lang ko mo-ik.
Pag-abot namo sa UCV’s Best Inn, nagpa-check in dayon mi sa counter. Short time lang. Wala itug-an ni Homer ngadto sa babaye nga nagbantay sa counter ang matuod namong mga ngalan. -- Sumpayan pa