Misyon sa kasingkasing

Gula 87

Mitan-aw siya’g salida sa telebisyon. Boxing ang iyang gitan-aw, ang ikaduhang panagsangka nila ni Manny Pacquiao ug Erick Morales.

Dihay nanuktok sa pultahan. Mitindog siya ug giablihan kini. Nakugang siya pagkakita nga si Debra ang diha sa gawas. Iya kining gipasulod. Gipalingkod sa sopa. Gipawong niya ang telebisyon.

“Nalipay ko nga nalimpiyohan na gyud ang imong ngalan,” nagkanayon si Debra. “Nga naklaro na gyud nga dili ka usa ka kidnapper.”

“Salamat,” uga ang tinubagan ni Bradley.

“Abi mo, Bradley,” ni Debra pa. “Bisan nasayod kong dili diay mo tinuod nga manag-agaw si Sandra pero wala baya ko masuko. Misalig man gud ko nga ako ang imong gimahal.”

Wala motubay si Bradley sa gisulti ni Debra.

“Karon nga nasulbad na ang imong problema,” matud ni Debra,” dili ka pa ba gihapon andam nga makigminyo nako?”

Nabatyagan ni Bradley nga ingon sa mibukal ang iyang dugo sa iyang nabati. Gitutokan niya’g maayo si Debra.

“Gipakaingon ko’g nipis ka’g panit, Debra,” ni Bradley pa. “Baga ka man diay og nawong?”

“Nga-nganong nakasulti ka’g ingon niana?” May tuno sa kalagot ang pangutana ni Debra.

“Tungod kay nakahimo ka gihapon sa pagpatuo kanako nga limpiyo kang pagkababaye ug takos sa akong paghigugma.”

“W-wa ko ikaw hisabti?” -- Sumpayan pa