Bus-aw sa udtong tutok

Sa sinugdan, wa kaayo hatagi og bili ni Ines, ang pagpunay og panubod sa kabasa sa iyang bilahan. Apan naunsa ba hinuon nga pagkahitaboa, nga sagunson na man kini nga modagayday sa iyang bilahan?

"Dili ka angay mahibulong niana Ines? Nahitabo na kanhi kanako sa dihang nagsingabot ang among kasal ni anhing Tatay nimo Paquito?" dihay inahanong maymay nga tambag ni Ibang ngadto sa iyang anak nga dalagang guwang nga kaslonon ni Tinong.

Wa lang kadto tubayi og tubag ni Ines, ang gipamulong sa iyang inahan nga biyuda. Nagmata lang kini og buntag, sa nahitabo kanilang duha ni Tinong, diin siya nakapanakla sa dili insakto nga oras.

"Mas bintaha akong mahal nga Ines ... nga madimdim nato og una ang saro sa himaya, taliwala ning kinawatkawat tang pagtinagayay sa katam-is!" sagol kayuring ang sinultihan ni Tinong niadtong higayona.

"Basin baya Tinong ... nga human nimo masapli ang inampingan nga gihay sa akong kaputli, dili kana mopadayon pa og pakasal kanako?" pilit pa sa isdang kome nga hugot nga mikupot sa hawak ni Tinong.

"Maghikog gayod ako puslan man nga masugamak ako sa dili tiaw nga kaulawan dinhi sa atong silingan ning atong balangay sa Lantawan!"

Dili man god sayon ang gibati nga kahingawa ni Ines kun simbako, molayas ang maong lalaki nga nakapahimulos na sa iyang pagkababaye.

Sa panuigon nga kalim-an ug walo, nagpasalamat gani si Ines, nga nakasakay pa sa kataposang biyahe sa tren, diin gidaginot siya ni Tinong, nga kun buot hunahunaon manghod ra kaayo niya og panuigon.

Baligho sa panahon mausabon. Tulin pa sa alas kuwatro nga milayas si Tinong sa Mindanao ug wa mahinayon ang gitakda nga kasal nila ni Ines.

"Nay Ibang ... motang-on pa kaha kining pagpunay og kabasa sa akong bilahan? Usa na god ka galon nga akong nasawod kay magpunay man og dagayday kada minutos?" mabalak-on nga nangutana si Ines ngadto sa iyang inahan nga biyuda.

Igo lamang nga mitamihid ang iyang inahan diin kini nagkanayon.

"Maayo lang kanang imong bus-aw sa udtong tutok ... anak, kun digamohon ka og usab ni Tinong!" (Kataposan)