Misyon sa kasingkasing

Gula 85

Paglabay sa usa ka takna nahiabot sila si Col. Antipon ug Mr. Fernan Diolan sa Talamban. Gisugat sila nila ni Sandra ug Bradley sa ilang pagpanganaog sa sakyanan.

Nahimong emosyonal ang panagkita nila ni Mr. Diolan ug Sandra. Wala kapugngi ni Sandra ang iyang mga luha samtang migakos siya sa iyang amahan.

“Pasayloa ko, Papa,” ni Sandra pa.

“Ako’y angay mangayo og pasaylo nimo, anak,” matud ni Mr. Diolan. “Sangko sa langit ang akong pagbasol kun nganong misugot ko nga ibuya ka ngadto ni Morris. Sta. Ana. Mirisi ra sab nga namatay tong tawhana.”

“Si Mama Casilda,” sukit ni Sandra. “Kumosta na siya? Hain man siya Papa?”

“Tua sa Davao,” maoy tubag. “Kun wala pa mosugmat ang iyang arthritis, mokuyog gayod unta kadto kanako. Nabalaka na siya’g maayo sa imong kahimtang.”

“Maayo ang akong kahimtang, Papa,” matud ni Sandra, “tungod kay wala ko pasagdi ni SPO1 Bradley Mangubat.”

“Ang imong abductor?”

“No, Papa. Dili daotang tawo si Bradley. Siya ang nagtabang nako aron makalikay gikan kang Morris.”

Nalipay pag-ayo si Nang Diday nga nahibalik na si Bradley. Nabalaka usab kini pag-ayo kun unsa gyu’y tinuod nga nahitabo nila ni Sandra ug Bradley. -- Sumpayan pa