Ang Impiyerno ni Belen - 2

Gula 19

Dihang nakabiya na si Galen sakay sa iyang motorsiklo aron paghatod sa ubang mga sulat ngadto sa lainlaing panimalay -- misulod ko sa balay. Gibutang nako sa lamesita sa may sala ang sulat nga alang nila ni Papa ug Mama. Dayon miadto ko sa banyo ug nagbutang og napkin sa akong underwear isip depensa sa regla.

Paggawas nako sa banyo, milahos ko sa akong lawak. Milingkod ko sa ngilit sa kama. Unya mihigda. Nagpitokpitok ang akong mga mata nga mitutok sa kisame. Unya misantop si Galen sa akong hunahuna.

Dugay na kong nakaila kang Galen pero dili mi suod. Maisip nga usa lang ka casual acquaintance ang among panagkaila. Tingali tungod kay wala mi mutual interest. Maong karon lang ko nakamatikod sa iyang kaguwapo. Karon lang ko nahinulong niya.

Kun kalitan siya’g tan-aw, look-alike diay ni Galen si Tom Cruise, ang American actor nga Tom Cruise Mapother IV sa tinuod nga kinabuhi ug nakadaog isip best actor sa academy awards alang sa pelikula nga “Born On The 4th of July” niadtong 1989.

Ambongan gyud lagi si Galen. Dili lang daling mamatikdan ang iyang kaambong. Dili daling mahinulongan, labina’g dili ka magpaduol niya. Dili ka ma-attract niya kun dili mo siya tutokan pag-ayo. Mora ba’g alahas nga dili mo masuta ang matuod nga bili kun dili mo kini makilatis pag-ayo. Maisip nga hidden asset ni Galen ang iyang kaguwapo. -- Sumpayan pa