Ang bulan sa akong bintana

Fly Me to the Moon, Moonriver, Moonlight Serenade, Desert Moon, Moonlight Flower, Lover's Moon. Kabilugan Ng Buwan, ug uban pang kanta ug huni nga nagdayeg sa bulan makapahinuklog og maayo kanako.

Ang bulan naghatag kanako og tugob nga inspirasyon nga mabuhi pa niining kalibotana taliwala sa atong natagamtaman nga mga kalisdanan sa kagubot sa pamilya, problema pinansyal, sa akong pagtuon, sa mga makalilisang nga sakit, problema sa trabaho, ug labi na sa gugma. Ug ang mga gimugna sa mga banggiitang kompositor nga nagadayeg sa kaanindot sa bulan, sama sa mga kanta ug huni, dayag lang nga miumol sa akong pagkatawo.

Dihang ang mga astronaut nga sila si Neil Armstrong ug Edwin Aldrin miabot sa bulan ug naglakaw-lakaw pa gani ngadto, nangandoy sad kong mapareha nila bisan og 4 anyos pa ang akong pangedaron niadtong panahona.

Unya magabii kun bulanon, mohangad ko sa langit ug akong sukod-sukoron ang gidak-on sa bulan pinaagi sa akong tudlo ug kumagko. Unya makatawa ko nga maghuna-huna, kagamay sa bulan morag ako rang makumkom.

Unya nia pay mga katigulangan nga sa bata pa ko hangtod karon gigamit sa pagpanag-an. Ug akong mga ambisyon nga para nako posible ug sa ubang tawo imposible, ila kong sultihan nga mora kuno kog ningsukmag sa bulan.

Bulanon pagbalhin nako sa akong balay nga gi-loan, kay maoy akong nadunggan pirmi nga hayag ug nindot ang pagpuyo, kun lingin ug hayag kuno kaayo ang kaugmaon, kun bulanon mobalhin. Bulanon sab kadtong nauyab nako ang akong pangasaw-unon apan nagkabulag sad mig hapit na bulanon, kay siya napamabdosan sa lalaki nga iyang gikaila sa Moonlight Disco. Kay hilig man og sayaw anang Get Down by Backstreet Boys niadtong panahona, nga pagkahuman sa disco gi-'lay down'' sa iyang nakaila nga nauyab gyod, ug pila ka bulan ni-"blow up" gyod iyang tiyan.

Wa lang koy kalibutan sa ilang mga binuhatan. Pero tungod sa kaanindot sa bulan nga akong gisud-ong, linaw ang akong hunahuna nga bisan nakahibalo nako sa ilang hinanggaw, ako na silang napasaylo sa ilang kahiwian. Labi na pod ang akong mga ginikanan nga magsige lang og away magabii, mogawas na lang ko sa balay ug mohangad sa langit ug motutok na lang sa bulan ug malinaw na ang akong hunahuna ug galamhan.

Labi na karon nga may kaugalingon na kong poder kun may nagkalainlaing problema nga buot nakong sulbaron motutok lang ako sa bulan diha sa akong bintana ug dili na kinahanglang moguwa. Dili na ko magduhaduha pagsulbad sa akong mga problema ug umaabot pang mga problema kay kaabin ko na ang bulan sa akong bintana. Ug dili pa gyod mosuway paglu-ib kanako hangtod sa kahangturan.

Mao nga kun ako na sad nga makita ang bulan sa akong bintana, motugtog dayon sa akong galamhan ang mga walay kamatayong huni nga Fly Me to the Moon, Moonlight Serenade, Desert Moon, Moonlight Flower, Lover's Moon, Kabilugan ng Buwan ug uban pa. Samtang nagmakinilya niining akong sinulat, samtang nagsud-ong sa matahom ug mahayag nga bulan diha sa akong bintana, ang akong tanang problema nangawala. (Kataposan)