Misyon sa kasingkasing

Gula 84

Wala motingog si Sandra. Lain ang iyang gihunahuna niadtong tungora.

“Panahon na sab tingali nga mogawas na kita sa atong gitagoan,” nagkanayon si Bradley.

“U-unsay buot mong ipasabot?” Mikunot ang agtang ni Sandra.

“Patay na si Morris Sta. Ana ug ang iyang mga sakop. Nasulbad na ang atong problema busa dili na delikado. Kinahanglang mamalik na kita ngadto sa siyudad aron kalimpiyohan nako ang akong ngalan nga gibulingbulingan ni Col. Rivera.”

Pag-abot nila sa siyudad sa Sugbu, nanawag dayon si Bradley kang Col. Cesar Antipon. Gipahibalo niya ang iyang labaw nga migawas na sila si Sandra sa ilang gitagoan.

“Tayming kaayo ang inyong desisyon, SPO1 Mangubat,” nagkanayon si Col. Antipon,” tungod kay ania ang amahan ni Sandra Diolan sa Sugbu aron pagpangita kaniya.”

“Kun mao kana, Sir,” ni Bradley pa,” pahibaw-a siya nga mahibalik na kaniya ang iyang anak.”

“Oo, Mangubat,” sa koronel. “Pahibaw-on dayon nako si Mr. Fernan Diolan. Nakaseguro kong malipay gayod siya niining balitaa.”

Kahilom.

“Hain ba kamo karon, Mangubat?” Pakisusi sa Koronel.

“Dia sa among balay sa Talamban,” tug-an ni Bradley.

“Kun mao kana, paabota kami diha. Moanha kami karon dayon kuyog na ang amahan ni Sandra Diolan.” -- Sumpayan pa