Misyon sa kasingkasing

 Gula 82

Kagabii nasubli sa ikaduhang higayon ang seksuwal nga panagtagbo nga nahitabo tali kanilang duha. Apan hangtod karon wala pa siya masayod sa real score tali kanilang duha ni Bradley.

Dili supak sa iyang kabubut-on ang nahitabo kanila. Nalipay siya ug nasayod siyang nalipay usab si Bradley sa ilang gibuhat. Apan samtang nagtambayayong sila pagkatkat sa kinapungkayan sa himaya kagabii, wala niya mabati gikan sa baba ni Bradley ang mga pulong sa pagmahal ug paghigugma. Mao nga wala siya masayod kun unsay gibati ni Bradley alang kaniya.

Siya? Sukad sa una nilang panagkita, gaan na ang iyang buot ngadto kang Bradley. Gidayeg niya ang maayong mga hiyas nga nabatonan sa ulitawo. Tingali, mao na kadto ang gitawag og crush. Wala hinuon siya makaseguro kun nahigugma ba usab siya ngadto kang Bradley. Apan nakaseguro siyang nakagusto siya niini.

Apan wala siya mangandoy nga matibuok ang usa ka commitment tali kaniya ug ni Bradley. Kaniadto gusto niyang mag-kontrabida sa kinabuhi ni Debra, ang girlfriend sa ulitawo. Apan nausab ang iyang panud-ong sa dihang iyang nasuta nga nahigugma gayod pag-ayo si Debra kang Bradley. Gani, gusto na man si Debra nga makigminyo kang Bradley.

Nareyalisar niya nga dili siya angay ilogan si Debra sa kalipay niini. Si Debra ang may dakong katungod sa pag-angkon kang Bradley tungod kay managhigugmaay man ang duha. Samtang siya ulahi na kaayong miabot sa kinabuhi ni Bradley. -- Sumpayan pa