Misyon sa kasingkasing

Gula 79

Nahitutok si Bradley kang Sandra. Ingon sa dili siya makatuo sa gisulti sa dalaga. Nahibulong siya. Ang uban ganing babaye sama sa ikog nga magsunod-sunod kanunay sa lalaki kun madisgrasya na. Maneguro nga pakaslan gayod sa lalaki. Apan lahi si Sandra kay ingon sa gibalewala lang niini ang nahitabo kanila.

“Kun wa ka pa makabantay,” ni Sandra pa,” tug-anan ko ikaw nga aloof ako ngadto ni Debra. Di ko gustong mahimong kontrabida sa iyang kinabuhi hangtod sa hangtod. Igo na nga nahuwaman ko ikaw kaniya sa hamubong panahon.”

Wala makatingog si Bradley. Karon pa siya makasugat og babaye nga sama kang Sandra.

Alas nuybe sa gabii. Nakapahimutang na sila si Col. Cesar Antipon sa baybayon nga nahisakop sa usa ka hilit nga barangay sa lungsod sa Argao diin gikataho nga adto idunggo ang shipment sa Molimoli Gang, ang bigtime syndicate nga responsable sa dinagkong transaksiyon sa gun smuggling sa Kabisay-an ug Mindanao.

Giabagan sila sa kapolisan sa Argao. Maayo na nilang pagkapuwesto ug andam na sa bisan unsang mahitabo.

Paglabay sa kapin sa usa ka takna, dihay mga sakyanan nga nangabot sa dapit diin naghupo na sila si Col. Antipon. Upat ka luxury vehicles ug usa ka container van ang misubay sa gamay’ng dalan-dalan ilawom sa kalubihan ug mihunong duol sa daplin sa baybayon.

Naniid lang sila si Col. Antipon. Ang iyang mga sakop naghulat lang kanunay sa iyang mando. Mao usab ang mga sakop sa Argao PNP. -- Sumpayan pa