Misyon sa kasingkasing

Gula 78

Ug gitagsatagsa na pag-at-at ni Col. Antipon ang ilang plano. Gipatin-aw niya’g maayo ang mga detalye sa angay nilang buhaton aron dili gayod sila mapakyas.

“S-sorry sa nahitabo kagabii,” gipakigsultihan ni Bradley si Sandra human sa ilang pagpaniudto.

Ania sila sa may kayda diin lab-as kanunay ang hangin.

Sukad sa nahitabo tali kanilang duha wala pa sila magkasultihanay. Kaganina sa ilang pagpamahaw wala sila magtingganay. Mao usab sa ilang pagpaniudto, nahisama sila sa mga amang. Sa higayon nga magkatagbo ang ilang mga tinan-awan, halos magdungan sila’g lingiw.

Apan karon gipakigsultihan na gayod ni Bradley si Sandra. Gusto niyang maklaro ang tanan mahitungod sa nahitabo kanila. Dili siya gusto nga maghunahuna si Sandra nga gipahimuslan niya ang pagsalig niini kaniya.

“Dili maoy akong tuyo ang pag-take advantage nimo,” mipasabot si Bradley. “Nadala lang ko sa kalimbatianon sa higayon. Naanod ko sa sensation. Busa pasayloa ko.”

“Wa kay angay pangayoan og pasaylo,” matud ni Sandra. “Kagustohan usab nako ang nahitabo nato.”

“Kun unsay mahimong linugdangan sa nahitabo kanato, andam kong manubag. Di ko motalikod sa akong kaakohan.”

“Ayaw kabalaka mahitungod niana. Kun mahitabo man nga magbunga ang atong gibuhat, wa kay tulobagon. Di ko ikaw hasolon.” -- Sumpayan pa