Gula 77
“Areglado, Mr. Sta. Ana.”
“Mao kini ang labing dakong shipment sa Molimoli Gang nga gipayuhot nganhi sa Sugbu. Busa seguradoon nato nga molampos kita niini.”
“Unsang orasa nato sugaton ang shipment?”
“Alas onse imedya sa gabii.”
“Okey. Karon dayon pahibaw-on nako ang akong mga tawo. Kinahanglan nga mga quarter to ten atua na kita sa dapit.”
“Mao gyu’y husto, Col. Rivera.”
Gitigom ni Col. Cesar Antipon ang tanang mga polis nga ubos sa iyang pagpangulo. Naghimo siya’g briefing.
“Nakadawat ko’g intelligence report nga may moabot nga shipment sa smuggled nga mga armas gikan sa Mindanao nga adto idunggo sa Argao,” nagkanayon si Col. Antipon. “Sumala sa report, ang maong mga kontrabando anhi dad-on sa dakbayan sa Sugbu.”
“Unsa may atong buhaton, Sir?” Nangutana si SPO1 Adonis Angbetic, ang laing sinaligan ni Col. Antipon sunod kang SPO1 Bradley Mangubat.
“Kinahanglang ma-intercept nato ang maong mga kontrabando didto pa lang sa dapit nga dunggoan niini,” matud sa koronel. “Nakig-coordinate nako sa kapolisan sa Argao. Mipasalig sila nga moabag.”
“Maayo hinuon kun mao kana, Sir,” ni SPO1 Angbetic, “aron dili kita maglisod sa pag-intercept sa maong shipment.”
“Mao nga paminaw kamo. Ingon niini ang atong buhaton.” -- Sumpayan pa