Ang misteryo sa karaang sementeryo

Kalit nga nabuak ang kahilum sa kagabhion sa barangay Bagakay dihang nangayo og pakitabang ang barangay tanod nga si Kiko. Nagkapandolpandol kini nga nagdagan padulong sa tindahan ni Iya Miray. Tabang! Tabaang mga silingan! nagkanguhal nga nagsiyagit si Kiko. "Ngano ka, naunsa ka Kiko?" hapit magkadungan og pangutana ang nakuyawan nga managhigala nga sila si Joel, Bobby, Aying ug Mark nga nag-inom og bahal niadtong tungora sa tindahan ni Iya Miray.

"Nakakita ko og multo atol sa akong pag-roving nga nilabang sa karsada gikan sa karaang sementeryo, "tubag ni Kiko.

"Mao usab kana ang estorya ni Tasyo nga habalhabal driver niadtong usang gabii may nadungog kuno siya nga lanog kaayo nga uwang sa iro unya duna kunoy multo nga nagpasopaso dapit sa may entrada sa sementeryo," sakbat ni Iya Miray nga naglikit sa iyang tinostos.

Pagkagabii niana, gipakuyogan na sa barangay kapitan si Kiko nila ni Ilyong ug ni Baste, mga kauban niyang tanod. Gawas sa flashlight nagbitbit usab sila og batuta ug nagtakin pa gayud og pinuti. Sa wala pa sila magsugod ug roving niyarok una ang tulo og tagsa ka botelyang nga siyoktong sa tindahan ni Iya Miray aron pagpainit sa ilang tingkoy. Naunsa ba sab nga nauso man ang kawat sa ilang dapit.

Niadtong usang gabii ang kabaw nga toro ni Aying ang kalit nga nahanaw sa gihigtan niini ug giapil pa gayud pagdala sa kawatan ang usa ka basket nga lemonsito nga igtotomod unta ngadto sa merkado. Adto usab nga niaging semana ang hiniktan ni Joel nga talisayon nga katulo na kuno kabuno, ang gisignit sa mga kawatan. Mao'y ilang suspect ang mga batan-on sa ilang barangay nga nakat-on na sa pagamit og ginadiling drugas. Karon nadungagan pa ang problema sa mga tanod aning multo nga nakapahadlok og maayo sa mga lomolupyo.

Nagpadulong na ang tulo sa may karaang sementeryo, daw ata sa nokos ang kangitngit sa kagabhion ug unya kalit lang nihuros ang bugnaw nga hangin. Nanindog ang balhibo sa tulo ka tanod. Ilang gihugtan og kupot ang ilang dala nga mga armas.

Samtang dili halayo sa ilang nahimutangan sa may karaang sementeryo, nagpahipli sa mga nitso sila si Propesor Ortok, usa ka treasure hunter, ug ang duha niini ka mga alalay nga sila Hugo ug si Pascual.

"Adunay nagdulong dinhi dapit sa atong nahimutangan Hugo mao nga andama na ang atong mp3 player ug ipatokar dayon ang intro sa kanta ni Michael Jackson nga Thriller dapit sa portion nga may uwang sa iro, e-full ang volume," mando ni Propesor Ortok." Ug ikaw usab Pascual, isul-ob na ang kapa nga puti ug pasopaso dayon sa atubangan sa sementeryo. Atong hadlokon ang mga lomolupyo aron walay makatugaw sa atong pagpangita sa hidden treasure ni Limahong nga sumala sa atong mapa ania nahimutang dinhi sa karaang sementeryo sa Bagakay."

Ug unya nilanog ang makapanlimbawot sa balhibo nga uwang sa iro. Mora og kandila nga giugbok ang tulo ka tanod. Nanagko ang ilang mga mata dihang maoy ilang nakita nga may nagkapa og lubos puti nga nigawas   gikan sa sementeryo. Mora og kwitis nga giduslitan nga naglumba og panagan ang tulo ka tanod.

Nagkadungan og bahakhak sila si Propesor Ortok ug ang mga alalay niini. "Ha! Ha! Ha! Nagmalamposon kita sa paghadlok sa mga tawo dinhing dapita. Atong ipadayon ang pagpangita sa hidden treasure kay mao kini ang atong gamiton nga pondo inig dagan nako og mayor didto sa among lungsod sa Buenavista sunod tuig. Ha! Ha! Ha! Ha!" (Kataposan)