Misyon sa kasingkasing

Gula 74

Pero wala sila’y nakuha gikan ni Nang Diday. Bisan giunsa nila kini’g pugos sa pagpatug-an, wala gayod mohatag ang lagas og bisan unsang kasayoran ngadto kanila mahitungod nilang Bradley ug Sandra. Tinuod man gayod usab nga walay kasayoran si Nang Diday sa nahitabo. Apan posibleng may ideya kini kun asa ang dapit nga posibleng dangpan nila ni Bradley ug Sandra apan nagdumili lang gayod kini pagtug-an ngadto nila ni Morris ug Col. Rivera.

Sa kalagot ni Morris nga wala siya’y nakuhang kasayoran gikan kang Nang Diday, iya unta kining patyon apan gisanta siya ni Col. Rivera.

“Kun imo kanang buhaton, Mr. Sta. Ana,” ni Col. Rivera pa. “Tingalig mabulilyaso na hinuon kita.”

Mikalma ang kaputong ni Morris.

Gabii na usab. Nakita ni Sandra si Bradley nga naglingkod sa nag-igdal nga dakong gamot sa kahoy sa may tugkaran sa balay. Lamdag ang tugkaran nga gibanwagan sa kahayag sa buwan.

Giduol ni Sandra si Bradley. Ingon gani sa nakugang ang ulitawo sa pagkamatikod niini kaniya. Ingon sa lawom ang gihunahuna niini.

“W-wa ba ko makadisturbo nimo?” Sukit ni Sandra.

“Wa man,” mubong tubag ni Bradley.

“M-may ipangutana lang unta ko nimo. Mahimo ba?”

“U-unsa kana?”

“Gusto kong masayod kun unsa ako sa imong kinabuhi. Kun nganong nagsakripisyo ka man sa pagtabang nako?” -- Sumpayan pa