Misyon sa kasingkasing

“Sa nagbansiwag nga balita sa mga pamantalaan karong adlawa.”

“Oo, diay. Nagpalit ka man og pamantalaan kaganinang buntag. Hain na man to?”

“Akong gihiposan. Nahibawo ka ba kun ngano?”

“Nga-ngano man diay?”

“Ang nahitabong pinusilay didto sa Talamban maoy headline sa mga balita. Ang nakapait kay akoy giduot ni Col. Rivera dihang nahinabi siya sa taga media. Gipasanginlan ko niya nga mi-kidnap nimo.”

“U-unsa?”

“Mao kana, Sandra. Wanted na ko karon. Gipangita na ko karon sa mga awtoridad sa kasong kidnapping.”

“My God! Unya, unsa man karon ang nahunahunaan mong buhaton?”

“Wa pa ko masayod. Nagplano kong manawag ni Col. Antipon, ang akong opisyal. Ang problema kay wala may network coverage sa cellphone ning dapit nga atong nahimutangan karon.”

“Ayaw kabalaka, Bradley. Kun magkinaunsa man, dili ko ikaw pasagdan. Tabangan ko ikaw sa paglimpiyo sa imong ngalan sa pasangil ni Col. Rivera batok kanimo. Malagmit may kalabotan si Morris niini.”

“Posibleng husto ka tungod kay suod kaayo ang duha.”

Nanawag si Morris Sta. Ana kang Col. Ver Rivera.

“Unsa nay balita, Col. Rivera?” Pakisusi ni Morris. “May development na ba mahitungod sa pagkahanaw nila ni Sandra ug SPO1 Mangubat?”

“Wala pa gyud, Mr. Sta. Ana,” matud sa koronel. “Na-trace na hinuon namo nga mi-check in sila sa usa ka hotel sa uptown area. Pero wala na siya maabti sa akong mga sakop tungod kay kaadlawon pa silang mi-check-out.” -- Sumpayan pa