Misyon sa kasingkasing

Gula 68

Apan nakugang siya sa paghimuntog niya sa sala. Wala si Bradley sa bangko nga gihigdaan niini dihang iyang giiwagan. Mao ray iyang nakita ang habol ug unlan niini.

Kalit kaayong gikulbaan si Sandra.

Gipangita ni Sandra si Bradley. Nakaplagan niya kini sa may kayda, naglingkod sa bitang ug nag-atubang ngadto sa sidlakan diin malantaw ang pikas nga buwan nga mao pay pagsubang. Namatikdan ni Sandra nga naghinuktok si Bradley.

“M-mora ma’g lawom kaayo ang imong gihunahuna?” Ang kahuyo sa tingog ni Sandra ingon sa nakigduyog sa mabugnaw’ng tayhop sa hangin sa kagabhion.

“Naghunahuna lang ko sa atong kahimtang,” nagkanayon si Bradley. “Tungod sa kakalit sa mga panghitabo, wala ko magdahom nga mahiabot kita dinhi karon.”

“Kasal-anan ko kining tanan, Bradley,” ni Sandra pa. “Lakip ka naangin sa akong problema.”

“Ayaw pagsulti’g ingon niana. Walay nagpugos nako sa pagtabang nimo. Ako kining kabubut-on, akong desisyon.”

“Wala ka ba magbasol nga imo kong gitabangan?”

“Wala koy angay pagabasolan. Hinuon misamot ang akong interes sa pagtabang nimo karon. Gusto kong makaila pag-ayo ni Morris Sta. Ana. Gusto kong masayod kun nganong suod sila si Col. Rivera.”

Wala motubay si Sandra sa gisulti ni Bradley.

“Tuod,” ni Bradley pa. “Wala ko pa diay ikaw kasultihi.”

“Sa unsa?” sukit ni Sandra. -- Sumpayan pa