Tulisan sa ATM

Alas 7 sa gabii. Taud-taod nang nagbarog-barog si Podong distansiya og pipila ka metros sa usa ka ATM sa may dan Magallanes. Mingisi siya sa dihang may usa ka hamtong nga babaye ang miduol sa ATM ug miwidrow.

"Wa'y kauban ang babaye. Higayon ko na usab kini nga makakwarta," ni Podong pa sa iyang kaugalingon samtang gihinol ang puan sa kutsilyo sa bulsa sa iyang karsones.

Tuod man sa dihang nahuman na ang babaye sa iyang tuyo sa ATM, milakaw kini ug gisundan dayon ni Podong. Milingi-lingi si Podong sa iyang luyo ug sa dihang nakita niyang layo ra ang mga tawo sa iyang palibot, kalit niyang giagbayan ang babaye.

"Ay'g palag, Day. Tulis ni ug hait kaayo ning kutsilyo sud sa akong bulsa. Ihatag dayon nang kwarta nga imong giwidrow sa ATM," matud ni Podong nga maguwang lang sa hunghong nga tingog ngadto sa babaye.

"O, Undo. A..ayaw lang tawon ko’g pasakiti kay ihatag ko man ang kwarta." Tubag sa babaye nga labihang kuyawa.

Tapos ihatag sa biktima ang iyang kwarta daling mipalayo sa maong dapit si Podong biniyaan ang babaye nga naghilak samtang nagtungko sa daplin sa sidewalk.

Daghan na ang nabiktima ni Podong sa iyang pagpangatang sa mga tawong mowidrow sa ATM sa nagkalain-laing dapit sa siyudad sa Sugbo. Babaye ug lalaki, batan-on o tiguwang, basta wa kini kauban sa ATM seguro kining mabiktima niya. Dili sad siya daling kadudahan nga dautang tawo kay postorawo man mamiste.

Milabay ang mga adlaw, usa ka gabii niana, nagpaatbang na usab si Podong sa usa ka ATM sa may dan Borromeo. Usa ka sakyanang Pajero ang mihunong tungod sa ATM ug migawas sa tinted nga sakyanan ang usa ka lalaki.

Miduol kini sa ATM ug miwidrow og ubay-ubay nga papel de bangko. Sa dihang mikuot kini sa iyang pitaka aron isud ang kwarta, daling miduol si Podong.

"Parts, kalma lang. Tulis ni ug talinis kaayo ning ice-pick nga gidul-it sa imong kilid. Ihatag dayon nang kuwarta," hinay ug pinagahi ang tingog ni Podong.

"Ooy, morag nasayup ka ron sa imong buot biktimahon, bay." Kalmadong tubag sa lalaki.

"Lingi ra gud sa imong luyo aron makita nimo."

Tuod man milingi si Podong sa iyang luyo ug nakita niya ang usa ka tawo nga nagtion sa iyang pusil tumong sa iyang ulo. May bodyguard diay kini nga nagbantay ug didto ra sud sa sakyanan naglantaw. Di siya maklaro sa sud niini kay tinted man ang windshield.

Gida si Podong sa iyang buot untang biktimahon ngadto sa usa ka balay ug didto gitabangan siya’g kulata sa mga bata-bata sa maong lalaki. Gibinlan lang siya’g gamay'ng kinabuhi ug may panimuot pa siya samtang nabatyagan niyang giitsa siya sa usa ka mangitngit ug lawom nga dapit. Wa magdugay ug napusgay ang iyang ulo nga kusog mihagsa sa usa ka dakung bato. (Kataposan)