Salamat sa agokoy

Labihan gyud nga gugmaha ni Juvi kang Joann. Gani, bisan kun uyab na silang duha, wapa makahawok ang ulitawo sa iyang hinigugma bisan sa aping na lang.

"Bida bai Joel, unsaon kaha nako no nga makahawok ko kang Joann nga di siya masuko?'' ni Juvi pa ngadto sa iyang higala usa ka adlaw niana.

"Ah, grabeha sad nimo Juv, moduha namo ka buwan nga uyab unya wa pa gyud ka kahawok niya?" sukot ni Joel nga di katoo sa gisulti sa iyang higala.

"Tinuod lagi bai 'Wel. Usahay kutob ra ko sa gunit sa iyang kamot," kumpisal ni Juvi.

"Mao tingaling di ka kursonada nga makigromansa ni Joann kay kanunay man mong mag-estoryahay sud sa ilang balay. Gawas-gawas mo panagsa. Manuroy ba mo sa dakbayan. Naa ra man gyud na sa unahan sa ilang balay ni Joann," tambag ni Joel.

"Akong suwayan nang tambag nimo bai 'Wel. Makigpanuroy kong Joann unyang hapon sa baybayon," tubag ni Juvi nga nadasig sa gisulti sa higala.

Tuod man, gihangyo ni Juvi ang hinigugma nga makigpanuroy sa daplin sa baybayon ug misugot ang dalaga.

"Pareho man tang nag-short, Ann, moyaka lang ta's bas. Di naman sad init kay talisalop nang adlaw," matud ni Juvi nga miuna og yaka di layo sa may kabatoan nga daghang mga agukoy ang nagkamangkamang.

Misunod si Joann sa pagyaka sa bas ug pareho silang nag-atubang sa kalawran.

"Nindot sad nga panagsang magpalabay sa oras dinhi's baybayon, Ann, no?" ni Juvi pa nga nagpanlingi sa ilang luyo kun wa bay laing tawo.

"Bitaw, Juv," tubag ni Joann nga wa ibuwag ang panan-aw ngadto sa kalawran.

"Igo ra nya mi ani's estorya. Kun di pa lang ni buotan si Juvi, hagbay ko ra ning gibuwagan," ni Joann pa sa iyang kaugalingon nga dugay na diay naghuwat sa romansa sa ulitawo.

Samtang nag-estoryahanay ang duruha, kalit may nabatyagan ang dalaga nga mikuhit-kuhit og hinay sa iyang sampot.

"Oy, mao diay nga makigpanuroy ning kanahan dinhi's baybayon kay may plano diay," ni Joann pa sa iyang kaugalingon nga gipasagdan lang ang daw nagpagilok sa iyang sampot.

"Nahilom man ka’g kalit, "Ann?" sukot ni Juvi nga sip-ig nagyaka tupad sa dalaga.

"Kinsay di mahilom nga sekreto man kaayo kang nagpagilok sa akong sampot," tubag ni Joann inubanan og pahiyom.

"Ha?" Mao ba?" nakurat si Juvi sa gisulti sa dalaga ug gitan-aw ang luyong bahin ni Joann diin nakita niya ang usa ka agukoy nga mora sad og nauyon pagsigeg bag-id sa iyang kuyamoy sa sampot sa dalaga.

Sa nakita ni Juvi sa gibuhat sa agukoy nga wa ikasuko sa dalaga kinsa nagtuong si Juvi ang nagpagilok kaniya, nakabaton og kaisog ang ulitawo. Kalit gigakos ang dalaga ug giukoban ang mga ngabil niini. Wa molugnot si Joann ug mibawos hinuon kini sa paggakos sa ulitawo.

"I love you, Ann. Salamat sa agukoy." Nakatuaw ang ulitawo. (Kataposan)