Misyon sa kasingkasing

Gula 65

Apan nasagmuyo si Bradley sa ilang pag-abot. Pulos na walay nagpuyo ang mga balay sa iyang mga uyoan. Nagpangutana sila sa labing duol nga silingan. Nasayran ni Bradley nga unom na diay ka bulan ang nakalabay sukad nga namalhin pagpuyo ang iyang mga uyoan ngadto sa Negros.

Maoy unang milalin ngadto sa Negros ang iyang Tiyo Miguel. Misunod usab paglalin ang iyang Tiyo Max, ang kamanghorang igsuon sa amahan ni Bradley nga maoy nagpuyo sa balay sa iyang apohan. Matud pa sa iyang gipangutana, napugos pagpamalhin ngadto sa Negros ang iyang mga uyoan gumikan sa pagbahis sa mga rebelde sa barangay Nug-as.

“Nganong wa man gyud sila magpahibawo namo didto sa siyudad?” Nakaingon si Bradley.

“Tungod tingali sa kakalit sa ilang pagbiya niining lugara, Dong,” nagkanayon ang lagas nga babaye nga iyang gipangutana.

Nakahukom si Bradley nga adto sila si Sandra mopuyo sa balay sa iyang apohan nga taudtaod nang walay nagpuyo. Maayo ang maong balay kay nahimutang kini sa tago nga dapit. Dili daling matultolan kun may mangita kanila. Layo sa karsada ug layo usab sa mga silingan.

“Okey ra ba alang nimo kining dapita?” Gisukit ni Bradley si Sandra samtang nagtambayayong sila sa paglimpiyo sa sulod sa balay pinaagi sa pagpanangtang sa abog nga nagkapal sa sawog ug bungbong niini. -- Sumpayan pa