Gikasilagan ko ang kalibotan

Gula 70

Nakasulod na sila si Roy ug mga kauban sa studio. Apan wala sila makahimo sa pagpusil kang Ethan tungod kay na-hostage man niini si Sonia.

“Sige, Roy Cleopaz,” ni Ethan pa nga mition sa pistola nga gigunitan niini ngadto sa ulo ni Sonia,” kay unang mabuak ang bagulbagol ni Sonia Atienza.”

“Kun buhaton mo kana,” bahad ni Roy, “dili ko usab ikaw buhion.”

“Wa nay bili alang kanako ang akong kinabuhi, Mr. Cleopaz. Pero kun bililhon alang kanimo ang kinabuhi ni Sonia Atienza, ayaw gayod pagpakita og lihok nga makahagit kanako sa pagkablit sa gatilyo ning akong armas.

Nakita ni Sonia ang kalisod sa sitwasyon. Maglisod sila si Roy sa pagpusil kang Ethan tungod kay gihimo man siyang taming niini. Mao nga naghunahuna si Sonia og paagi nga makatabang siya sa kapolisan.

Nagpadayon ang negosasyon tali kang Roy ug Ethan. Apan si Ethan nagdumili gayod pagsurender.

Dihang milugak og diyotay ang paggunit ni Ethan kang Sonia, nakakita siya’g higayon. Kalit niyang gipaak ang bukton sa lalaki. Nakasinggit kini sa gibating kasakit ug nabuhian siya niini.

Si Sonia miligid dayon sa salog dihang gisinggitan siya ni Roy sa paghapa. Dihadiha milanog ang mga butobuto. Nakasiyagit si Sonia sa kalisang.

Dihang mitang-on ang mga buto-buto, nakita ni Sonia si Ethan nga nahagba sa salog nga naglunang sa kaugalingong dugo. Wala na kini kinabuhi. -- Sumpayan pa