Sagol kabalaka ug kakuyaw ang gibati ni Sonia. Nakita niya nga nanukad pag-ayo si Ethan. Ang armas hugot kaayong gigunitan niini nga gitumong sa pultahan. Kun mamugos gayod si Roy sa pagsulod, seguradong wala gayod kini dag-anan kun pusilon ni Ethan.
“Sonia,” gikan na usab ni Roy nga didto pa sa gawas, “ablihi kining pultahan!”
“Sige, PO1 Roy Cleopaz,” si Ethan ang mitubag. “Sulayi ang pagsulod aron seguradong kaugbokan og kandela ang imong lawas karong gabhiona.”
“Ampo nga malinawon, Ethan Herra,” matud ni Roy. “Nasayod na kami nga ikaw ang nagpatay kang Helen Ogmoc ug kang Ninez nga burikat. I-ampo ang imong kaugalingon aron dili modako ang imong silot.”
“Dili ko moampo,” matud ni Ethan. “Magkamatay ta kun mamugos ka gyud pagsulod!”
“P-pagbantay, Roy,” ni Sonia pa. “Armado si Ethan.”
Milagaak ang katawa ni Ethan. Sa tan-aw ni Sonia wala na gayod kini kalainan sa usa ka demonyong sungayan. Daw gipanuwayan na gayod pag-ayo si Ethan.
“Dakpa ko, Roy Cleopaz,” daw gihagit pa ni Ethan ang polis. “Tan-awon ta kun may mahimo ka ba batok kanako.”
Sa kalit lang may mitindak sa pultahan. Naabli kini. Apan abtik si Ethan. Gipusil niya ang polis nga midasmag sa pultahan. Mihay-ad kini nga naigo sa pagpusil sa kriminal nga photographer. Midali si Ethan pagduol sa nahimutangan ni Sonia. Giabis niini sa punyal ang pisi nga gigapos sa iyang mga kamot ug tiil. Diha-diha gi-hostage si Sonia ni Ethan. Gihimo siyang taming niini batok sa mga polis. -- Sumpayan pa