Misyon sa kasingkasing

Gula 61

Nahibulong si Bradley sa iyang kaugalingon. Wala siya mobati og kasakit sa balatian bisan nasayran niyang nagluib si Debra sa ilang relasyon. Iya hinuong giisip nga blessing in disguise ang nahitabo tungod kay may lig-on na siyang sukaranan sa iyang pagbalibad sa higayon nga mousab si Debra sa pagpanghagad nga magminyo na sila.

Samtang nag-inusara si Sandra sulod sa lawak sa hotel, nagkadaiyang butang ang misulod sa iyang hunahuna. Iyang gihanduraw ang iyang kahimtang. Ingon sa usa ka makalilisang nga daman sa udtong tutok ang midangat sa iyang kinabuhi.

Maayo gani kay miabot sa iyang kinabuhi si Bradley. Hulog gayod sa langit si Bradley alang kaniya aron mahimo niyang knight of shining armor. Kun wala pa tingali si Bradley, ambot kun unsa nay nahitabo kaniya karon.

Talagsaon nga pagkalalaki si Bradley. Nakadayeg siya sa kabuotan ug sa kamatinud-anon niining motabang. Giisip niyang dakong utang kabubut-on kang Bradley ang pagtabang niini kaniya nga makalikay gikan kang Morris Sta. Ana.

Naputol ang paghanduraw ni Sandra sa dihang miigot ang pultahan sa lawak nga ilang giokupar sa pagsulod ni Bradley.

“Wa ka pa diay matulog?” Sukit sa ulitawo pagkamatikod niini nga nagmata pa siya.

“Di pa ko katulgon,” tubag ni Sandra. “Naghuwat ko nimo.”

“Nahadlok kang dili nako mobalik?” -- Sumpayan pa