Misyon sa kasingkasing

Gula 59

“Kinsa ba gayod diay kini si Morris Sta. Ana?” Gipangutana ni Bradley si Sandra. “Nganong may armas man siya ug ingon man ang iyang mga tawo?”

“Dili ko makatubag nimo niana,” ni Sandra pa. “Diyotay ray akong nasayran mahitungod kaniya. Nailhan siyang barumbado ug burukinto didto sa Davao. Abusado kaayo. Nagsalig kay kun makasala, areglohon man lang dayon sa iyang amahan nga kongresista.”

“Ang akong nalibgan pag-ayo kun nganong ingon sa suod kaayo sila si Col. Rivera. Nakaila ko sa maong polis. Siya’y giilang labing corrupt nga police official dinhi sa Cebu. Mga hunch and circumstantial evidence pa lang ang among nahuptan batok kaniya maong wala pa gayod siya mataktak sa trabaho.”

Wala motubay si Sandra sa iyang gisulti.

“Katulog na,” ni Bradley, “kay ugma, mosayo kita’g check-out dinhi sa hotel.”

Mipaingon si Bradley sa pultahan sa lawak nga ilang giokupar aron mogawas.

“A-asa ka man diay?” Nangutana si Sandra nga ingon sa nabalaka.

“Moadto lang ko’g kadiyot sa mezzanine floor,” tubag ni Bradley.

“Ayaw baya ko’g biyai, ha.”

“Dili lagi. Kadiyot ra kaayo ko.”

Sa coffee shop sa hotel nga ilang giistaran, didto si Bradley mahilumon nga naglingkod atubangan sa bakanteng lamesa nga hinimo sa bildo. Nagkalingaw siya’g inom og kape samtang nagpalabay sa mga tagkna. -- Sumpayan pa