Daghan ang nag-ingon nga trato kami si Kevin. Apan di baya. Friend lang kami. Hinuon, kinsa man say di magtuo nga di kami trato nga kanunay man kami magkuyog sa pagsulod og paggawas sa unibersidad nga among gieskuylahan. Kami sab kanunay ang mag-uban sa pagpangaon sa canteen sa eskuylahan. Wa na nuoy lalaki nga nangahas sa pagpangulitawo nako.
Hangtod na sab si Kevin. Guwapo siya ug macho, apan igo na lang sa pagpangandoy ang mga babaye nga naibog kaniya kay nagtuo man sila nga boyfriend ko siya.
"Kaluoy sa mga babaye nga nakagusto nimo, Kevin. Nagtuo gyod nga wa na silay paglaom nimo. Unsaon, kanunay man kang makigkuyog nako." Mikatawa ko usa ka higayon nga nag-window shopping kami sa SM. Wa dayon kami mamauli gikan sa eskuylahan. Sabado niadtong adlawa. Halfday lang ang among klase. Managsama kaming graduating na sa kursong Education.
"Aw, maglaway lang sila nako."
Mipakibo ko sa akong mga abaga. Wa man sab koy nasayran nga dunay babaye nga gipangulitawhan si Kevin. Di man siya bayot og hitsura. Lalaki gyod kaayo siyang tan-awon.
"Ikaw, Dith, nganong wa pa may boyfriend?"
"Wa koy gusto sa mga lalaki nga nangulitawo nako, uy. Alang-alang man sab kun sugton ko sila nga wa koy love. Unfair nila, di ba?" Unya gitutokan ko ang ulitawo. "Ikaw, nganong wa say girlfriend?"
"Aw, parehas nimo, wa koy nagustohan nga laing babaye. Someday, masayran mo kun nganong wa koy gipangulitawhan."
Wa ko makatubag kang Kevin. Nagpatuotuo ko nga nagdula-dula sa akong kuko sa tudlo. Unsaon, wa ko makaagwanta sa iyang tinutokan nako. Morag may gipasabot siya sa iyang gisulti. Kalit lang kong gikulbaan. Apan hilom kong nalipay. Wa ko makasabot nganong nalipay ko.
Kun busy kita sa atong pag-eskuyla, di lang gyod mahibaw-an ang kusog nga pagdis-og sa mga adlaw. Miabot ang adlaw nga nakagradwar kami si Kevin sa college. Nagselebrar kami pagkasunod adlaw. Nanuroy sa siyudad. Nangaon sa gawas.
"It's about time na, Dith, nga masayod ka nganong wa koy gipangulitawhan nga babaye. Ikaw man ang akong love."
Nahunong ko sa paghungit sa pagkaon sa akong baba. Diha kami sa Chowking manihapon. Sayo pa ang kagabhion. Wa na ko makugang sa gisulti ni Kevin. Daan na kong nasayod nga aduna na siya’y feeling nako. Klaro sa iyang mga lihok ug tinan-awan nako.
"Well, angay ka na sab tingali masayod nganong wa koy gisugot sa mga lalaki nga nangulitawo nako. Ikaw sab ang akong love, Kevin."
Nagpahiyomay kami si Kevin. Ug ang sunod mao ang kusog namong katawa. Nahalingi ang ubang kustomer sa Chowking kanamo ni Kevin. Sa ilang nawong, wa kami nakita nga nasuko sila sa among kinataw-anay. Hinuon, mapahiyumon sila. Morag nakasabot sa among feeling ni Kevin niadtong tungora.
Nanggawas kami si Kevin sa maong kan-anan nga malipayon. Miagbay siya nako. Gikusi ko’g hinay ang iyang kilid. Unya nagkasabot kami nga manan-aw og sine. Nasayod ako nga someday, hingpit kaming magmalipayon sa usa’g usa. (Kataposan)