Misyon sa kasingkasing

Gula 58

Wala na mobalik sa Talamban sila si Bradley ug Sandra nianang pagkagabii. Mi-check-in sila sa usa ka hotel nga nahimutang sa usa ka sudlonon nga dapit sa uptown area sa siyudad.

Nasuta ni Bradley nga dili ordinaryo ang grupo ni Morris Sta. Ana nga iyang gikabangga. May koneksiyon kini sa kapolisan sa dakbayan sa Sugbu. Mituo na gayod si Bradley nga tinuod ang gisulti ni Sandra kaniya nga gamhanan ang pamilyang Sta. Ana, didto sa Davao kay bisan gani hangtod dinhi sa Cebu may impluwensiya pa man kini sa pipila ka sakop sa polisya.

Nakahukom si Bradley nga ipalayo si Sandra sa dakbayan sa Sugbu. Puslan man nga nahinaykan na niya ang pagtabang kang Sandra, iya na lang gayod nga hingpiton ang pagtabang niini. May nahunahunaan na siyang dapit diin adto niya dad-on si Sandra aron mahilayo na gayod kini sa mga tawo nga nagpangita niini.

“Ugma sa sayo sa buntag mobiyahe kita,” giingnan ni Bradley si Sandra.

“A-asa man kita paingon?” Sukit sa dalaga.

“Sa Alcoy,” maoy tubag. “May mga kabanay ko sa usa ka bukirang barangay sa maong lungsod. Adto una kita didto motago.”

Wala motingog si Sandra. Apan nabasa ni Bradley sa hun-ag sa panagway niini ang gibating hilabihan nga kabalisa. -- Sumpayan pa