Gikasilagan ko ang kalibotan

Gula 65

Wala makatingog si Sonia. Nasayod siya nga kun prangkahan niya si Ethan nga wala gayod siya’y pagbati bisan gamay na lang ngadto niini, mosamot ang kadaot sa utok niini. Mosamot og kayabag!

“Lisod ba kong higugmaon, Sonia?” Nangutana si Ethan pagkilab sa pipila ka daklit.

“D-dili ko makatubag nianang mao mong pangutana, Ethan,” ni Sonia pa.

“Ug nganong lisod man?”

“Tungod kay bisan higugmaon ko man ikaw, wala gihapoy katumanan ang atong gugma. Sikopon ka sa mga tinugyanan sa balaod sa higayon nga masayran nila nga ikaw ang nagpatay kang Helen Ogmoc ug kang Ninez nga burikat.”

“Walay laing nasayod niining maong tinagoan gawas lamang kanimo, Sonia. Kun dili nimo tug-anan ang kapolisan, dili sila masayod mahitungod sa matuod kong pagkatawo.”

“Walay aso nga makumkom, Ethan. Moabot ra gihapon ang panahon nga dili na matago ang imong gibuhat.”

“Dili na lang kita maglalis mahitungod niana. Ang gusto kong masayran karon kun kanus-a mo ako higugmaon.”

Wala motubag si Sonia.

“Higugmaa ko, Sonia,” ni Ethan pa. “Ikaw lang ang akong gilaoman nga makatabang aron maka-recover sa trahedyang nahitabo sa akong kinabuhi.” -- Sumpayan pa