Si Erning Praning ang tawag kaniya sa taga-estero. Kanunay siyang makita nga magyaka daplin sa tulay nag-ulang sa lang-og nga sapa ug sa dapit sa mga eskuwater sa siyudad nga giokupahan sa sobra 50 ka mga pamilya.
"Erning praning...!"
"Erning buang....!"
"Erning adik...!"
Biaybiayon siya sa kabataan ug bisan na gani sa mga lumolupyo sa estero nga malabyan siya nga magtungok-magyaka daplin sa tulay. Usahay, pareglahan pa gani si Erning sa mga estambay. Kulatahon. Bun-ugon. Nakuyawan ang mga molupyo sa estero sa iyang pagka-praning sa halawom nga pinsada sa iyang panghunahuna.
"Maayo pag hipuson na siya sa mga barangay tanod...!"
"Bitaw! Ipabalhog sa prisohan kay tingalig maghuramentado...!"
"Kuyaw kun manglugos og mga dalaga...!"
"Tingalig mamaregla sa kabataan...!"
"Basin mangawat og kabtangan sa estero...!"
Maoy hinungdan nga gibadlong ni Sarah ang bugtong anak niyang lalaki nga mibatig kaluoy kang Erning Praning.
"Unsa ka ba, Dong Billy! Giingnan tika nga ayaw na lagi’g duol-duol anang Erning didto sa tulay...!"
"Ma, naluoy man ko ni Noy Erning! Gitagaan nako’g syakoy....!"
Sa edad nga 7, si Billy mao na ang badibadi ni Sarah sa iyang panginabuhian sa estero. Manindahay siya og syakoy nga gipangunayan niya sa pagluto matag adlaw ug isuroy sa tibuok eskuwater. Mao kini ang matang sa panginabuhian nga gibuhi niya kang Billy, nga nailo na sa kargador niyang amahan sa pantalan.
Tulo na ka adlaw nga nagbunok ang makusog nga ulan. Way bagyo, apan paspas nga midailos ang baha gikan sa naupaw nga kabukiran sa siyudad. Linugdangan kini sa way hunong nga pagbuldos sa developer og yuta ug gihimong subdivision ug villages. Miawas ang tubig sa sapa sa estero. Nasinati ang grabeng baha. Naglunop! Nagkaguliyang ang mga molupyo sa estero sa wa damhang trahedya. Gisanapan sa tubig ang kabalayan. Naanod ug naguba ang tulay sa estero. Nabati ang singgit-pakitabang sa mga molupyo sa estero nga gipang-anod na sa baha.
Mikalit sa pagtungha si Erning Praning. Gipakita niini ang kahanas sa paglangoy. Gitagsatagsa niya sa pagluwas ang naanod nga mga tawo sa baha ug lunop ug gidala sa luwas nga dapit. Kapin sa 40 ka mga molupyo sa estero ang naluwas ni Erning sa pagkalumos.
Nagpaninggit og pakitabang si Sarah. Wala na niya makupti si Billy nga naanod sa baha nga nagkapyot sa usa ka tabla.
"Dong Billy....! Dong Billy...!"
Maoy nasugat sa panan-aw ni Sarah ug sa mga molupyo sa estero nga naluwas ni Erning, ang paspas nga paglangoy sa giila nilang praning ug giluwas si Billy nga nagpusngapusnga na sa kusog nga baha. Gidala ni Erning si Billy sa nahimutangan ni Sarah nga hugot migakos sa anak. Misinggit ang mga tawo ngadto ni Erning. Ang kanhing mitamihid ug mibiaybiay nga mga tawo sa estero, karon, midayeg na sa bayanihong gibuhat ni Erning.
"Mabuhi si Erning! Mabuhi...!"
Gikapoy na sa paglinangoy si Erning. Wala na siya makalingkawas sa kusog nga bul-og sa baha, ug nakita sa tanan ang paspas niyang pagkaanod sa unahan.
Pagkaugma, wa kapugngi ni Sarah ang paghilak ug paggakos kang Billy. Nahinuklog usab ang tanang taga estero nga naluwas ni Erning gikan sa pagkalumos sa baha. Naugkat ang lawas niini. Ug patay na ang ilang manluluwas! (Kataposan)