Gikasilagan ko ang kalibotan

Gula 63

“Wala siya’y nahimong sala ngari kanako personal mente. Pero dako siya’g sala nga nahimo sa katawhan. Tungod sa iyang pagka-burikat, daghang mga pamilya ang nagguba. Gikasilagan ko usab ang mga babaye nga sama kaniya.”

Inanay nga nakaamgo si Sonia nga peligro ang iyang kahimtang. Misantop sa iyang hunahuna nga mentally unbalanced si Ethan. Kinahanglang mangita na siya’g paagi nga makaikyas gikan sa ulitawo sa dili pa kini makahunahuna paghimo’g daotan kaniya.

“Manggawas na ta gikan dinhi, Ethan,” ni Sonia pa nga wala magpasabot nga nahadlok na siya sa ulitawo. “Tingalig mangabot na kadtong uban nimong mga bisita.”

“Wala nay laing moabot karong gabhiona dinhi sa akong panima’y, Sonia,” nagkanayon si Ethan.

“U-unsay buot mong ipasabot?”

“Dili tinuod nga birthday nako karon. Gilansisan ko lang ikaw aron mosanong ka sa akong hangyo nga moanhi sa akong gipuy-an.”

“U-unsa?”

“Mao kana. Ug karon nga ania ka na, dili na ko makatugot nga makagawas ka pa gikan dinhi.”

Mikurog ang mga tuhod ni Sonia sa iyang nadungog.

Nasuta karon ni Sonia nga may daotan gayod nga tuyo si Ethan kaniya. Ang kalisang mikuyanap sa iyang katibuk-an. Unsay iyang buhaton aron makalingkawas siya niining lalaki nga nagtinguha og daotan kaniya. -- Sumpayan pa