Ikog ni Bantay

Mibakasyon ang magtiayon nga si Entong ug Julie sa ginikanan sa babaye didto sa bukirang barangay sa Boljoon. "Maayo kay nakahunahuna mo'g duaw dinhi sa probinsya, 'Tong," matud sa inahan ni Julie nga malipayong misugat sa iyang anak ug bana niini gikan sa siyudad sa Sugbo. "Nindot bakasyonan dinhi sa inyo Nay kay layo sa polyosyon ug layo sa silingan. Way saba di sama sa siyudad nga nagkalainlaing kasaba ang madungog," tubag ni Entong ngadto sa ugangan nga taudtaud nang nabiyuda. "Agwanta lang mo dinhi kay gamay ra tag lugar ug lamparilya ray atong suga magabii."

"Daku naman diay ang irong si Bantay nga among gida dinhi motuig na ang milabay," sagbat ni Julie nga naghapohap sa ulo sa iro.

"Wa pa na malimot ninyo si Bantay. Di man dayon makalimot ang iro, labi na kay kamo ang nagda niya diri. Siya'y akong kauban kun magkuha ko sa kwarta nga inyong ipada nako didto sa lungsod."

"Maayo sad nuon Nay nga aduna kay kauban dinhi sa balay bisan tuod ug lig-on ka pag lawas sa edad nimong kapin na sa 60," ni Entong pa dayon lahos sa taas sa payag.

Pagkagabii human sila manihapon, nagbukhad dayon og banig ang inahan ni Julie.

"Mao ning kinabuhi dinhi sa ato 'Tong, tapos og panihapon magpahimutang sa higdaanan. Ari lang ko dapit sa may pultahan duol sa kusina kay usa ra gyud ning atong lawak." Nagkanayon ang inahan ni Julie.

Wa magdugay ug nanghigda na sila. Distansya lang og usa ka dupa si Julie sa iyang inahan ug si Entong dapit sa bongbong.

"Day Jul, natug na's Nanay. Pastilan diay'ng ngitngita kun pagngon nang lamparilya. Unya Day, ready na ka? Ako diri morag batang bag-ong natawo," hagawhaw ni Entong samtang naghinol sa mga bundo sa asawa nga naghabol uban kaniya.

"Ganina rang ready 'Tong. Gahuwat lang ko nimo. Paghinay lang kay basin mouyog ning payag," tubag sa asawa nga naghapohap sa dughan sa bana.

"Ay'g kabalaka Day Jul, ako'y mahibawo." Ni Entong pa dayong tabikong sa asawa.

Nahuman ang kombati sa duruha nga igot ra sa sawog-kawayan ang nahimo nilang kasikas.

"Giuhaw man ko day. Di lalim ning pinugngan nga kumbati da."

"Paghinay lang sa imong paggawas 'Tong. Kamang aron di moigot ang sawog kay mapugwat si Nanay."

Mikamang si Entong ug miagi ibabaw sa inahan ni Julie nga naghayang sa may pultahan. Wa niya mabantaye ang iyang kargada nga midapat sa nawong sa ugangan ug misagyad pa ang tumoy niini sa ilong.

"Huh! Kabaho ba atong misaghid sa akong ilong! Unsa man to?" singgaak sa inahan ni Julie nga nahapugwat sa pagkatug.

"Si Bantay, Nay nakasud sa payag. Misaghid tingali ang iyang ikog sa imong ilong," daling tubag ni Entong.

"Bahoag ikog iroa, oy. Ligoa unya na ugma 'Tong," matud sa tiguwang nga mibalik sa pagkatug.

Misamot ang uhaw ni Entong nga gikuyawang mobangon ang inahan ni Julie ug dagkutan ang lamparilya. (Kataposan)