Ang ungo nga hinimbahon

Namatay na gyud si Inse Claudia ug alang sa taga sityo Humay-humay ang kamatayon ni Inse Claudia maoy usa ka hingpit nga kahilom nga wala na unya’y magsige’g wakwak dinhi sa ilang sityo.

Mao man gyu’y ilang gidudahan si Inse Claudia nga maoy nagbalbal kang Saning nga mamaligyaay og binignit kay lagi nagabhian kini nga namalit og lubing sagay aron iyang gamiton alang sa iyang baligyang binignit. Apan diha ra kutob si Saning sa may dakong punoan sa mangga kay giatngan siya og usa ka mangtas nga ungo.

Gibugno si Saning, nakasinggit tuod apan naguhayguhay ang iyang tinai. Dihang may usa ka tawo nga nakaagi duol sa gibalbalan sa mangtas nga ungo nakamay-ong siya nga ang nawong niini sama gyud sa porma sa nawong ni Inse Claudia.

Unya, mao tong gibati na’g kahadlok ang mga taga sityo Humayhumay kay matag gabii, makadungog man sila’g tingog sa wakwak -- magbahisbahis kini nga adto ra sa itaas magtingog.

Ubay-ubay gyud ang nabalbal ni Inse Claudia apan may usa ka hitabo nga natigbasan siya kay ang iyang giabat usa man ka eskrimador ug may dalang pinuti. Natabas ang dapit sa kilid ni Inse Claudia ug mao kadto nga nagluya na kini ug nagbatang ug hangtod namatay.

Ug matud pa si Cristita nga anak niining dalaga maoy gibinlan sa pagka-mangtas niini. Apan way nituo nga si Cristita ang gibinlan sa pagka-ungo ni anhing Inse Claudia kay hinimbahon kaayo kini. Dili gyud masipyat nga matag Domingo makita gyud si Cristita nga mosimba ug adto pa gani kini sa may atubangang lingkoranan molingkod.

“Matay, Pre, mao nay gitawag nga ungo hinimbahon,” ni Damian pa ngadto sa iyang kompare nga si Signos. Kining duha ka managkompare hilabihan ka himantayon ug karon si Cristita na pud ang ilang gibantayan. Mata’g lihok ni Cristita mora’g ilang gipanid-an.

“Dili seguro, pre, uy, dili tingali ungo kana si Inday Cristita, kay hinimba man,” ni Signos pa usab nga mora’g wala kaayo motuo sa gipahayag ni Damian.

“Unsay dili ungo gud, siya maoy gibinlan sa iyang nanay nga si Claudia,” nangugat si Damian.

“Basig wala modawat.”

“Unsay wala modawat, mahimo ba gud na. Basta anak gani modawat gyud na,” mora’g nangagot ang bag-ang ni Damian nga mipasabot sa iyang pagtuo.

“Sige, pre Damian, atong panid-an. Ugma kay Domingo man inig pangalawat na gani ug unya mogawas si Cristita kana nagpasabot nga puwerteng ungoa sad diay anang Inday Cristita,” ni Signos pa nga mipasabot usab.

Tuod, nianang pagka-ugma nanimba dayon ang duha ka himantayon nga sila si Signos ug Damian. Didto sa sulod sa simbahan, sa pagsugod sa misa, ilang nakita si Inday Cristita nga nagluhod sa may atubangang lingkoranan duol sa altar. Unya pag-abot sa tingkalawat sa lawas ni Kristo kalit lang nga mitindog si Cristita ug midalig gawas gikan sa simbahan.

“Unsa na, pre, di ba ungo gyud si Cristita,” ni Damian pa mihunghong sa iyang kompare.

“Karong gabii, pre, atong adtoon sa ila. Kay siya ra mang usa sa ila. Nahibawo ka na’g unsay atong buhaton. Lami ra ba’g lawas kana si Inday Cristita ug puti kaayo, he, he, he...” mitingsi ang kanahan nga wala mahadlok ug morespito nga nia sila sa sulod sa simbahan. Pagka-gabii, ilang gisaka si Inday Cristita ug didto sa kuwarto niini nakita nila kini nga naghigda pa nga nag-bra ug nagpanti lang. Sa kahidlaw sa duha ka hilabtanon, ila dayon kining gikuptan aron pahimuslan apan kalit kining milukso ug didto kini mokumpayot sa may pangki sa kuwarto. Ug unya nausab ang nawong niini ug nahimo kining usa ka mangtas nga ungo. “Waaaaakkkkk waaakkkk!” ni Cristita pa nga mikalit og dayib ug gibugno ang duha nga sila si Damian ug Signos. Pagka-ugma, may nadungog nga balita nga sila si Damian ug Signos hipalgang patay didto sa may ilawom sa dakong punoan sa mangga daplin sa sapa. Ug kun kinsay nagkunis-kunis sa ilang mga tinai, atay ug kasingkasing, way nasayod kay way nakakita sa pagbalbal kanila. Matag Domingo mosimba gyud si Inday Cristita apan mogawas dayon inig pangalawat. (Kataposan)