Misyon sa kasingkasing

Gula 54

Naglagot ba kaha sa pagpatuso-tuso ni Bradley, giinggansa ni Morris ang Uzi nga gigunitan niini. Nakabantay si Bradley mao nga mikalit siya pagligid sa dihang gipusil siya ni Morris. Miligid siya paingon sa sulod sa balay. Sa didto na siya sa sulod, gisirad-an niya ang pultahan.

“Sample pa lang kadto, SPO1 Mangubat,” ni Morris pa nga nagpabilin sa tugkaran sa balay. “Kun magmagahi ka sa paghatag ni Sandra kanako, magkamatay ta.”

Subling gilanit ni Bradley ang iyang armas ug gihugtan kini paggunit. Nagpahipi siya sa kilid sa bentana ug naniid sa gawas.

Nakita ni Bradley nga gisenyasan ni Morris ang usa sa mga kauban niini sa pagsulod sa balay. Milihok dayon ang gisugo. Dinhi wala nay laing nahimo si Bradley. Gipusil niya ang maong tawo. Mihagba kini sa tugkaran sa balay.

Ang maong hitabo nakapaiklam ni Morris ug mga kauban. Misibog sila ug nag-iyahay pagpangita og kapasalipdan. Si Bradley nangandam sa mosunod pang mahitabo. Wala gayod siya mobiya sa kilid sa bentana.

Dangtan og pipila ka gutlo, dihay nangabot nga duha ka sakyanan sa kapolisan. Miluag ang gibati ni Bradley. Nagtuo siya nga makatabang kaniya ang maong mga polis nga gipangulohan ni Col. Ver Rivera. -- Sumpayan pa