Gikasilagan ko ang kalibotan

Gula 61

“Giputol niya ang among relasyon sa dihang misulod siya sa kalibotan sa modelling.”

Unya nakita ni Sonia nga ang kasubo inanay nga mikamang sa panagway ni Ethan. Nakasabot siya sa gibati sa ulitawo.

“Gikasubo ko ang gidangatan sa inyong relasyon, Ethan,” ni Sonia pa.

“Di siya kasaligan nga pagka-babaye, Sonia. Wa siya’y baroganan tungod kay wa niya tumana ang maong gikasabotan. Gipalabi niya ang pag-model kay sa katumanan sa among gugma.”

“Tingalig dili gyud kamo alang sa usa’g-usa...”

“Mao kana ang kamatuoran nga dili nako madawat. Ug tungod niini, gikasilagan ko si Helen sa tibuok kong kinabuhi.”

Nakugang si Sonia sa gisulti ni Ethan.

Ingon sa dili makatuo si Sonia sa iyang nadungog gikan kang Ethan. Iyang nasihag sa panagway sa lalaki ang tumang kayugot.

“Dili kay ikaw ray nasilag sa kalibotan, Sonia,” ni Ethan pa. “Lakip usab ako. Gikasilagan ko ang kalibotan.”

“E-Ethan...”

“Kun nasilag ka sa kalibotan tungod sa mga lalaking walay baroganan, ako usab nasilag sa kalibotan tungod sa mga babaye nga walay dugokan.”

“N-nakasabot ko sa imong gibati. Pero kinahanglang dawaton mo ang kamatuoran. Sama nako. Tinuod nga gikasilagan ko ang kalibotan. Apan karon inanay na akong nakadawat nga ingon niini gyud ang kinabuhi, usahay unfair.” -- Sumpayan pa