Misyon sa kasingkasing
Gula 53
Nahugtan paggunit ni Bradley ang iyang armas pagkabati sa gipamulong ni Morris. Naitlib niya ang iyang wait. Nangandam siya sa bisan unsa nga posibleng mahitabo.“Gawas na diha sa balay, Sandra,” miusab pagsangpit si Morris.” Kun dili ka mogawas, kami ang mosulod diha sa imong nahimutangan.”
May misantop sa hunahuna ni Bradley. Unsa kaha kun sulayan niya ang pagpakignegosasyon kang Morris?
Gibalik niya’g suksok ang iyang armas sa hawakan. Unya hinay niyang giablihan ang pultahan. Mainampingon siyang migawas. Giigmat niya ang iyang mga mata aron pagpaniid sa kalihokan sa armadong mga tawo nga diha sa tugkaran sa balay.
“Unsay akong ikaalagad kaninyo, Brod?” Sukit ni Bradley nga nagpatuso-tuso.
“Ikaw ba si SPO1 Bradley Mangubat?” Misumbalik pagpangutana si Morris.
“Ako. Unsa man diay ang imong tuyo?”
“Nasayod na kami nga anaa kanimo si Sandra Diolan. Gusto ko nga iuli mo siya kanako.”
“Wala ako masayod nianang imong gipanulti, Brod.”
“Ayaw na lang pagpakaaron-ingnon, SPO1 Mangubat. Nasayod na kami nga ikaw ang gidangpan ni Sandra dinhi sa Cebu sa iyang paglayas gikan sa Davao.”
“I’m sorry, Brod. Pero wala ko makaila nianang babaye nga imong gihinganlan. Tingalig nasayop lang ang naghatag kaninyo’g impormasyon.” -- Sumpayan pa
- Latest
- Trending
