Gikasilagan ko ang kalibotan

Gula 60

“Nakakita ka nianang gitabonan og kurtina?” Gitudlo ni Ethan ang usa ka bahin sa bungbong nga may gibutang nga kurtina.

“Oo,” ni Sonia pa. “Unsa man kana?”

“Duola ug susiha aron imong masayran,” sugyot ni Ethan.

Mihinay pagduol si Sonia sa bungbong nga may gibutang nga kurtina. Si Ethan nagpabilin nga nagbarog sa may pultahan.

Giwalis ni Sonia ang kurtina. Iyang nasuta nga usa diay ka kuwadro sa hulagway sa usa ka babaye ang gitabonan sa maong kurtina.

“Nakaila ka ba nianang maong babaye?” Nangutana si Ethan.

“Oo,” tubag ni Sonia. “Si Helen Ogmoc kini, ang modelo nga gipatay.”

“Husto ka,” mahimut-ong namulong si Ethan.

“Nganong nagbaton ka man sa iyang hulagway?” Gisukit ni Sonia si Ethan.

Niining tungora, mibiya na si Sonia sa dapit sa bungbong diin mahimutang ang kuwadro sa hulagway ni Helen Ogmoc ug mibalik sa gibarogan ni Ethan sa may pultahan sa estudyo niini.

“Tubaga ko, Ethan,” ni Sonia pa.

Miligdong ang nawong ni Ethan. “Ex-girlfriend nako si Helen Ogmoc.”

“U-unsa?” Nakugang si Sonia.

“Yes,” ni Ethan pa. “Ako siyang hinigugma kanhi. Apan tungod sa taas niyang ambisyon sa kinabuhi, wala siya motuman sa among gikasabotan.”

“U-unsay buot mong ipasabot?” -- Sumpayan pa