Gikasilagan ko ang kalibotan

Gula 59

Gibati ni Sonia nga dili siya komportable sa sulod sa balay human masayod nga sila rang duha si Ethan ang diha sa sulod sa maong balay. Dili siya komportable uban kang Ethan kun mag-uban sila sulod sa usa ka balay. Okey lang kun sa usa ka sakyanan sila mag-uban.

Lahi ang sakyanan kay sa balay.

“Dali, Sonia,” miagda si Ethan kaniya. “Adto una kita sa akong studio samtang magpaabot kita sa uban pa nakong mga bisita. May ipakita ako kanimo.”

“Unsa man?” Nangutana si Sonia.

“Sunod lang nako,” nagkanayon si Ethan nga miuna na paglakaw kaniya.

Nagduhaduha si Sonia pagsunod sa ulitawo. Apan namatikdan man usab niya nga ingon sa wala kini daotang tuyo kaniya maong misunod na lang siya niini.

Gisundan ni Sonia si Ethan nga mipaingon sa usa ka lawak. Gibuksan kini sa lalaki. Maoy unang misulod si Ethan ug gipasiga ang suga sa sulod sa lawak. Misunod pagsulod si Sonia.

“Mao kini ang imong studyo?” Nakapangutana si Sonia nga mianinaw sa hamugaway nga lawak nga sa bungbong may gipatapot nga lainlaing hulagway.

“Oo.” ni Ethan pa.

“Wow,” tuaw ni Sonia. “Nice.”

“Salamat,” nahimuot si Ethan sa iyang komplimento.

Gisuhid ni Sonia ang mga hulagway nga gipapilit sa bungbong. Kasagaran niini hulagway sa mga babaye. -- Sumpayan pa