Misyon sa kasingkasing

Human sa panagsulti nila ni Morris ug Debra sa cellphone, gitawagan gilayon sa nahauna si Col. Ver Rivera. Gipahibalo niya ang koronel nga nasayod na siya kun hain si Sandra ug gikinahanglan niya ang back-up niini sa pagkuha sa dalaga.

Wala na mosugot si Bradley nga mobalik pa si Sandra ngadto sa restaurant sa iyang inahan sa Manalili. Iya kining gihatod ngadto sa ilang gipuy-an sa Talamban aron pagseguro nga dili gayod makit-an ang dalaga sa mga tawo nga posibleng naglaroy-laroy na sa siyudad sa pagpangita niini.

Iyang gikuha ang cellphone number ni Sandra. Gitug-anan usab niya si Sandra sa iyang contact number aron magkakontakay sila matag karon ug unya kun gikinahanglan man.

“Mobalik una ko sa presinto,” nananghid na si Bradley pagkataudtaod. “Tingalig gipangita na ko sa akong labaw ug sa akong mga kauban.”

“Sige, Bradley,” ni Sandra. “S-sorry nga lakip ka nahasol niining akong kahimtang.”

“Ayaw na kana'g hunahunaa. Nakita ko lang nga angay kang tabangan mao nga ako kining gibuhat.”

Wala motingog si Sandra.

“Sige, adto na ko,” ni Bradley pa. “Apan ayaw pagkompiyansa dinhi. Kun may makita kang mga tawo sa palibot nga katingad-an ang mga lihok, tawag dayon nako. Okey?

Mitando si Sandra. -- Sumpayan pa