Gula 50
“Aduna, Mr. Sta. Ana.”
“Maayo hinuon kun mao kana. I-text lang unya kanako ang imong account name ug account number. Salig nga dili ko maantigong mopakyas og sabot. Anad na ko sa ingon niini nga deal.”
“Misalig ko nimo, Mr. Sta. Ana.”
“Pwes, tug-ani na ako kun hain karon ang babaye nga akong gipangita.”
“Anaa siya karon sa mga kamot sa usa ka polis.”
“U-unsa?”
“Mao kana, Mr. Sta. Ana. Anaa si Sandra mag-abot sa balay ni SPO1 Bradley Mangubat sa Talamban.”
“Pero nganong nahiabot man siya sa balay sa maong polis?”
“Mao kana’y wala nako masayri, Mr. Sta. Ana. Pero dili na kana importante. Ang mahinungdanon mao nga makuha mo si Sandra Diolan.”
Gihatag ni Debra ngadto ni Morris Sta. Ana ang sketch sa eksaktong lokasyon sa pinuy-anan nila ni Bradley sa Talamban. Sa ingon, dili maglisod si Morris sa pagtultol sa gipuy-an ni Sandra.
“Manawag lang unya ko nimo pag-usab kun makuha ko na si Sandra,” nagkanayon si Morris human niya makuha ang kompletong detalye nga buot niyang masayran aron mahimong sayon alang kaniya ang pagtultol sa nahimutangan ni Sandra.
“Paaboton ko ang imong pagtawag, Mr. Sta. Ana,” nagkanayon si Debra. -- Sumpayan pa