Gula 57
“May gipangutana lang siya nako. Di na kinahanglang masayod ka kun unsa kini.” Sa hilom gibati ni Sonia ang kalagot sa pagpangutikuti ni Ethan.
Gitutokan siya ni Ethan. Dayon mipahawa kini sa iyang atubangan.
Miatubang siya sa computer aron magsugod na’g sulat sa iyang news item.
Pagkasunod semana, nasayran ni Sonia nga gipatay si Froilan, ang lalaki nga maoy nakaingon sa paghikog sa iyang manghod nga si Anita. Nagbansiwag ang maong balita sa ilang pamantalaan. Si Helius Pusta maoy nakakuha sa maong balita. Sama kaniya, staff reporter usab si Helius sa Bantay Balita.
Gibasa gayod ni Sonia ang kompletong detalye sa balita. Nahitabo diay ang krimen sulod sa simbahan. Kaslon na unta si Froilan uban sa babaye nga buot pakaslan niini. Apan kalit lang gipusil si Froilan sa laing babaye nga kalit lang nahitungha sa simbahan.
Nagbayad na gayod si Froilan sa iyang kasal-anan ngadto sa mga babaye nga iyang gipahimuslan ug gipahilak. Didto molanog kining maong mga pulong sa kahiladman ni Sonia.
Wala maglisod si Sonia pagtultol sa gipuy-an ni Ethan. Dos andanas ang maong balay. Gikoral og hollow blocks nga habog kaayo. Ang ikaduhang andana sa balay lang ang makita sa gawas.
Mibusina si Sonia. Nakita niya nga nagsiga ang tanang suga sa sulod sa balay. Misantop sa hunahuna ni Sonia nga nangabot na tingali ang mga bisita ni Ethan. --Sumpayan pa