Gula 49
“Puyde bang magpaila ka una sa imong kaugalingon?” Gipangutana ni Morris ang iyang gitawgan sa dihang gitubag na niini ang iyang tawag.
“Ako si Debra Belloliso,” paila sa babaye didto sa pikas tumoy sa linya.”
“Tinuod ba ang kasayoran nga imong gi-text kanako?”
“Wa ko magtiaw, Mister...”
“Morris,” paila ni Morris sa kaugalingon. “Morris Sta. Ana.”
“Tinuod ang akong gi-text kanimo, Mr. Sta. Ana. Nasayod ko kun hain karon ang babaye nga inyong gipangita nga si Sandra Diolan.”
“Kun mao, tug-ani ako kun hain siya.”
“Tug-anan ko ikaw, Mr. Sta. Ana, apan ubos sa mga kondisyon.”
“U-unsa nga kondisyon?”
“Nga dili ka motug-an ni bisan kinsa nga ako’y naghatag kanimo’g kasayoran mahitungod kang Sandra.”
“Kun kana lang nga kondisyon ang imong pangayoon, sold ko niana. Ug dili kay kana ra. Hatagan ko pa gayod ikaw og salapi isip pahalipay sa imong pagtabang. Ang importante alang nako mao nga makuha ko si Sandra.”
“Maayo kay nagkasinabot kita, Mr. Sta. Ana.”
“Tug-ani na ko kun hain karon si Sandra. Sa higayon nga makuha ko na siya, ako nay bahalang modeposito sa kuwarta nga akong ipahalipay kanimo sa imong bank account. Tuod, may bank account ka ba?” -- Sumpayan pa