Gikasilagan ko ang kalibotan

Gula 56

“Wa man,” gitubag niya ang ulitawo.

“Mora ka man gud og absent-minded,” ni Ethan pa.

“Naghunahuna lang ko kun unsay angay nakong suwaton karon,” namakak siya kay ang tinuod, si Roy ang iyang gihunahuna.

Mibiya si Ethan sa iyang nahimutangan. Misulod kini ngadto sa opisina ni Mr. Johnny Orioque, ang editor-in-chief sa Bantay Balita.

Mibagting ang telepono nga diha sa ibabaw sa desk ni Sonia. Daklit kini niyang gitutokan. Unya iyang gipunit ang awditibo ug gitapion sa iyang dalunggan aron pagtubag sa nanawag.

“Hello?” Matud ni Sonia.

“Kumosta ka?” si Roy ang didto sa pikas tumoy sa linya.

“R-Roy...”

“Sorry sa pagdisturbo nako nimo. Nakaseguro kong daghan ka og gibuhat karon diha. Ako lang gi-check kun naa ka na ba sa office. Sige, bye...”

Ug gibutang na ni Roy ang telepono. Gibutang na lang usab ni Sonia ang awditibo nga iyang gigunitan.

“Kinsa tong gikasulti nimo sa telepono?”

Naigking si Sonia sa kalit nga pagduol ni Ethan sa iyang nahimutangan. Nahibalik na diay kini gikan sa buhatan sa ilang editor.

“S-si PO1 Roy Cleopaz,” mubong tubag ni Sonia.

“Unsa may iyang tuyo nimo?” -- Sumpayan pa