Miturok ang kasilag

Buntag sayo. Nag-atang ako'g kasakyan gikan sa akong gitrabahoan dihang nahiabot si Natalya, akong hinigugma, sa mga eskina diin naghulat ako og sakyanan. Nasabot kong importante kaayo ang iyang tuyo kanako. "May problema ba?" mihagad ko sa pagpangusisa. "Duna," laktod niyang tubag. "Exam na man god namo ugma."

Nakasabot dayon ko kun unsay tuyo ni Natalya. Kuwarta! Ako man god ang miabaga sa mga galastohan sa iyang pagtungha sa kolehiyo. Kabos ang iyang mga ginikanan ug walay ikagasto sa pagpaedukar kaniya. Maong nagsabot kami nga paeskuylahon ko siya unya kun makatapos na siya sa iyang pagtuon, magpakasal na kami. Ang suweldo nga akong madawat gikan sa pabrika nga akong gitrabahoan maoy akong gikuhaan sa tanang galastohan ni Natalya. Dili sayon ang akong trabaho apan milahutay ko sa tinguha nga makatapos sa pagtuon ang akong hinigugma.

"Pila may imong gikinahanglan?" sukit ko.

"P6,000.00," maikogon niyang tubag.

"Sige," matud ko. "Magkita ta unyang hapon aron ikahatag nako nimo ang kuwarta nga imong gikinahanglan. Sa naandang dapit nga atong tagboanan kita magkita, sa may Colonnade."

Tuod man nianang pagkahapon, paggawas gyod nako sa akong gitrabahoan, midiretso ako sa Colonnade. Nakita dayon nako si Natalya nga nagbarog duol sa pultahan. Ako siyang giduol.

"Kaganina ka ra?" nangutana ko.

"Dili pa dugay," mubo niyang tubag.

"Mangaon una ta," giagda ko siya.

Misulod kami sa usa ka outlet sa Jollibee ug nangaon. Samtang nagkaon, gitunol ko kaniya ang kuwarta nga iyang gikinahanglan. Gipakapinan pa kini nako alang sa iyang pang-allowance.

Ingon niini ang kanunay mahitabo matag ting-exam ni Natalya. Mangayo siya nako'g kuwarta alang sa iyang tuition fee. Apan wala ko kini baleha. Dako ang akong tinguha nga makatapos si Natalya sa pagtuon. Taas ako'g panglantaw alang sa kaugmaon namong duha sa higayon nga mosulod na kami sa kaminyoon.

"Usa na lang ka semester ang kuwang, Luc," matud ni Natalya usa ka higayon niana sa among panagkita. "Matapos na gyod nako ang akong pagtuon."

"Maayo hinuon," matud ko nga mibatig kahinangop. "Aron magpakasal na kita."

Wala motubay si Natalya sa kataposan kong gipamulong. Apan wala nako hatagi'g daotang kahulugan ang iyang reaksiyon. Nagtuo ko nga nalingaw lang siya sa daghang mga tawo sa among palibot niadtong higayona. Daghan man gong tawo sa foodcourt sa Metro Gaisano niadtong tungora.

Milabay ang usa ka bulan. Usa ka higayon niana, gikasulti nako si Ines, klasmet ni Natalya. Mitaho kini kanako nga gitabang kuno si Natalya sulod sa ilang classroom kay kalit lang nalipong. Maayo gani kay naulian kini dayon.

Gumikan sa maong katol nga kasayoran, mora ko'g gitil-asan. Miadto dayon ko sa pinuy-anan nilang Natalya aron magpakisusi.

"Wa toy kaso, Luc," matud ni Natalya. "Naglain lang ang akong kutokuto kaganina. Panuhot tingali. Wa kay angay kabalak-an sa akong kahimtang."

Tulin nga milabay ang duha ka bulan human niadto. Hapit na ang gradwasyon ni Natalya. Apan usa ka adlaw niana, mao na lang ang akong kahikugang sa gitaho ni Ines kanako.

"Wala na moeskuyla si Natalya," matud ni Ines. "Gitaban kini ni Richardy ug atua na sila karon sa Manila. Mabdos na og tulo ka bulan si Natalya."

"U-unsa?" mao ray akong nalitok kay ingon sa naluya ko sa akong nadungog. Nahugno ako sa akong nasayran. Wala ko magdahom nga makahimo si Natalya sa pagluib sa among gugma. Wala ko magtuo nga makaako siya sa pagbudhi sa among mga panumpa.

Nabatyagan ko nga inanay miturok ang kasilag sa akong galamhan ngadto ni Natalya -- ang babaye nga maoy nakaingon sa gugma kong napukling. Pero wala ko kapugngi ang pag-uliot sa akong mga luha. Samtang nabatyagan ko ang kamot ni Ines nga naghapuhap sa akong bukobuko. (Kataposan)