Misyon sa kasingkasing

Gula 47

“Dili maayong mokuyog ka pa kang Mama Diday sa restaurant. Tingalig makit-an ka sa mga tawo nga nagpangita kanimo. Mas maayo nga adto ka na lang sa balay.”

Nagkasabot sila.

Mibukal ang dugo ni Debra sa pagkabasa niya sa anunsiyo mahitungod kang Sandra nga napatik sa Banat News. Iya nang nasayran ang matuod bahin kang Sandra pinaagi sa maong anunsiyo.

Nasayran na karon ni Debra nga dili tinuod nga manag-agaw sila si Sandra ug Bradley. Iya usab nga nasayran nga dili taga Cagayan de Oro City si Sandra sumala sa gipatuo ni Bradley kaniya kundili taga Davao City kini. Sumala sa anunsiyo, walay mga kabanay si Sandra sa Cebu ug ang mga tawo nga nagpangita sa dalaga nagtuo nga midangop lang kini sa usa ka higala niini sa Cebu.

Naglagot pag-ayo si Debra. Gilingla lang diay siya nila ni Bradley ug Sandra pinaagi sa pagpatuo nga manag-agaw ang duha. Unsa kahay hinungdan nga gililong man nila ni Bradley ug Sandra kaniya ang matuod? May relasyon kaha ang duha ug dili sila gusto nga masayran niya ang ilang relasyon?

Gibati na hinuon niya ang pangabubho. Bantog ra nga sa unang panaghimamat nila ni Sandra, ingon sa wala gayod kini appeal ngadto kaniya, mahimo man diay kining kontrabida sa iyang kinabuhi. -- Sumpayan pa