Tulo pa lang gani ka adlaw, sukad gikasal si Utyang, ni Tonyo ... ning dako nilang simbahan sa lungsod sa San Fernando, himatikdan na ni Uray Simona, nga magtakiang ang iyang anak nga dalagang guwang nga bag-ohay pa lang naminyo.
"Ingon ba gyod niini ang mahitabo Nay Simona, nga hapdos kaayo ang atong bilahan ... ug magtakiang ang atong duha ka tiil og lakang?"
"Medyo ... maingon niana kun naghinubra ang inyong pagdigamohay ni Tonyo?" daling tubag ni Uray Simona, nga taudtaud nausab nga nabiyuda kang anhing Panyong, nga namatay kay gisungayan sa iyang kabaw kay nag-wild nga wa mapalunang.
"Mao ba Nay Simona, ang mahitabo?" mabalak-on nga nagpakisayod si Utyang.
Dili ikalimod nga sa panuigon ni Utyang nga may kalim-an na ug siyam ... karon pa gayod siya makasinati unsang klaseha sa kagilok, inubanan sa kahapdos nga iyang natagamtaman ... sa unang halandumong gabii human sa ilang kasal ni Tonyo.
"Anha nimo karon matagamtami akong mahal nga Utyang, unsa kabililhon ang kinabuhing minyo?" dihay gihagawhaw ni Tonyo kaniya samtang giukoban siya sa way tihik-tihik nga halok sa iyang ngabil.
Tingali pagbuot sa kapalaran, kay nagkapares man si Utyang ug si Tonyo nga pulos na guwang og edad.
Ambot unsang pagkahitaboa ... bisan sa kaawop sa pabilo sa lamparilya nga maoy ilang gigamit nga suga sulod sa ilang sibay, nasihagan man gihapon sa duha ka mata ni Utyang nga dihay mituybo sa kagahi nga daw ugat dapit sa may ubos sa bilahan ni Tonyo.
Sa sinugdan, wa lang kadto niya panumbalinga, hangtod sa pag-abot sa kaadlawon diin nanugaok na ang mga manok ... didto pa batia og dili tiaw nga kahapdos si Utyang, hangtod nga siya gikuyapan.
Mao na lamang kadto ... nga sa dihang nakatimaan na siya og insakto nga panimuot maglisod na siya og lakang sa duha niya ka tiil.
"Ngano kaha akong mahal nga bana ... magtakiang naman ko sa paglakaw ug mokaang?" nangarisgar siya og pangutana ni Tonyo, nga niadtong higayona maglugos na usab nga makabangon.
"Kitang duha Utyang ang nangabughat ... gumikan kay nagkanil ang atong matag ugat." (Kataposan)