Misyon sa kasingkasing

Gula 46

“Di-dili,” matud ni Sandra human masuhid ang maong numero. “Sinati ko ang numero sa cellphone ni Papa. Dili iyang numero kining gipatik uban sa anunsiyo kun dili kang Morris.”

“Kun mao kana, si Morris ang nangita kaniya. Ania na siya karon sa Sugbu aron pagpangita kanimo.”

Wala motingog si Sandra. Apan nakita ni Bradley nga misamot ang kaluspad sa panagway niini. Natugkad niya nga mibati ang dalaga og dili tiaw nga kabalaka.

“Dili maayong magkompiyansa ka, Sandra,” nagkanayon si Bradley.” Delikado kun makita ka ni Morris ug sa mga tawong posibleng iyang gisuholan sa pagpangita kanimo.”

Natugkad ni Bradley nga nabalisa pag-ayo si Sandra sa kasayoran nga iyang gibutyag ngadto niini. Iyang gialam-alaman ang dalaga aron pagpakalma niini.

“Ayaw kabalaka,” ni Bradley pa. “Samtang nia ko dili ka nila makuha sa dakong kasayon.”

“S-salamat, Bradley,” mao ray nalitok sa dalaga.

Nasayod si Bradley nga ang giluwatan niyang pasalig nakahatag og konsolasyon sa dalaga ug nakapahupay og diyotay sa kabalaka niini.

“Dili maayong magpasaya-saya ka, Sandra,” nagkanayon si Bradley.

“U-unsay buot mong ipasabot?” Mikunot ang agtang ni Sandra samtang mitutok kaniya. -- Sumpayan pa