Gikasilagan ko ang kalibotan

Gula 53

Nasuta ni Sonia ang kadako sa pagpakabana sa iyang kahimtang nga nag-inusara. Kun may mapangahason nga makasulod sa balay nga iyang gipuy-an ug maghimo’g daotan kaniya, wala gayo’y makatabang kaniya. Ang mga silingan dili kalaoman sa peligrong sitwasyon kay maneguro man lang usab sila sa pagluwas sa ilang kinabuhi.

Kun wala pa kadtong tawo nga nakita ni Roy nga naniid kanila, dili unta makahukom si Roy nga anhi na matulog sa iyang balay aron pagbantay kaniya. Apan kinsa man kaha usab kadtong tawo nga naniid kanila?

Mibangon si Sonia gikan sa iyang gihigdaan. Mihinay siya pagpaingon sa pultahan sa iyang lawak. Nag-amping siya nga dili makamugna og bisan unsang kasikas.

Gihinay niya’g abli ang pultahan. Gipakang-a niya ang palid ug milili siya ngadto sa gawas. Iyang nakita si Roy didto sa sala. Wala pa kini matulog. Nalingaw kining nagtan-aw sa salida sa telebisyon nga mao ang dula sa NBA.

Gibalik niya’g tak-op ang pultahan ug mibalik sa iyang kama. Mihigda siya. Wala madugay, nakatulog siya.

Pagkabuntag, sayong nagmata si Sonia.

Paggawas niya sa iyang lawak, iyang naabtan si Roy nga nagmata na ug nanghipos sa gihigdaan niining banig ingon man ang habol ug unlan. Mitimbaya kini pagkamatikod kaniya.

“Maayong buntag,” ni Roy pa.

“Maayong buntag sab,” tubag ni Sonia. “Nakatulog ka ba dinhi kagabii?” -- Sumpayan pa