Gikasilagan ko ang kalibotan

“Ngano man diay?” subling pangutana ni Sonia.

Mora man gud og may nakita kong bayhon sa usa ka tawo kaganina diha sa gawas sa koral,” ni Roy.

“U-unsa?” Nakugang si Sonia.

“Bitaw. Ambot lang kun wa ba ko masayop. Basta kay mora’g kita gyud ang gipanid-an.”

“Kinsa man kaha kadtong tawhana?”

“Ambot lang. Di pa sab ko makaseguro kun tawo ba gyud kadtong akong nakita. Basin gilimbongan lang ko sa akong panan-aw.”

Gikulbaan sa hilom si Sonia. Apan wala siya magpasabot ngadto ni Roy nga mibati siya’g kahadlok sa gisulti niini. Lain ang pangagpas nga diha sa iyang hunahuna. Tingalig daotang tawo ang naniid kanila.

Pagkilab sa pipila ka daklit, mihinay na usab si Roy pagpaingon sa may bentana. Namidpid siya sa kilid aron dili siya makita kun adunay tawo didto sa gawas. Halos pugngan ni Sonia ang iyang pagginhawa samtang hilom nga nagtan-aw sa gihimo ni Roy.

Unya nakita ni Sonia nga kalit lang gilanit ni Roy ang .45 kalibreng pistola nga diha sa hawakan niini.

“Ng-ngano, Roy?”

“Dinhi ka lang,” ni Roy nga midali paggawas sa pultahan.

Nagdagan si Roy nga migawas sa balay nga nagbitbit sa armas niini. Midiretso si Roy sa gate. Si Sonia igo lang misunod pagtan-aw sa polis. Migawas dayon si Roy sa gate ug duna kini gipabuthan. -- Sumpayan pa