Misyon sa kasingkasing

Gula 40

Gisugdan dayon ang salo-salo. Wala tuod ma-out-of-place si Sandra tungod kay wala man gayod magpalayo si Bradley kaniya. May mga higayon nga buot ni Debra nga bitaron si Bradley pahilayo kaniya apan mobalibad si Bradley. Niini, nakabantay si Sandra nga ingon sa naglagot na si Debra kaniya.

Samtang nagpadayon ang panaghudyaka sa nanambong sa salo-salo, kalit lang namulong si Debra samtang nagbarog sa tungod sa lamesa diin nangaon sila si Sandra ug Bradley. Gipaila ni Debra si Bradley ngadto sa uban niining mga bisita. Gipahibalo sa dalaga nga si Bradley maoy umaabot nga pamanhonon niini.

Nagkatinutokay sila si Sandra ug Bradley sa ilang nadungog. Nakita ni Sandra nga napahunong sa pagkaon si Bradley. Napihaw ang nawong niini, ingon sa wala magdahom sa gipamulong ni Debra.

Lawom nang gabii sa pagpamauli nila ni Sandra ug Bradley. Nagpahatod sila’g taxi paingon sa ilang gipuy-an sa Talamban.

“Minyoonon na diay mo si Debra?” Sukit ni Sandra samtang nagpadayon pagdagan ang taxi nga ilang gisakyan.

“Iya ra nang pagtuo,” mubong tubag ni Bradley nga ingon sa walay kadasig.

“Unsay buot mong ipasabot?”

“Nanghagad siya nako nga magminyo na mi pero mibalibad ko.” -- Sumpayan pa